Jeltoqsan aıynyń basynda ózim emdeletin emhanadan tıisti tegin dárilerimdi almaqshy bolyp barǵanymda dárihana qyzmetkeri: «Dári joq, ony alýǵa aqsha joq», dedi. Sodan ishimnen bıýdjetten qarjy bir jylǵa dep bólinedi. Sonda eki-úsh aıdyń aqshasy qaıda ketti eken dep oıladym. Al tilimniń ushyna naqty ne kelgenin aıtpaı-aq túsinýge bolatyny anyq. О́ıtkeni asa tereńdep ketkendikten, bizde jemqorlyq degen pálekettiń tamyryna balta shabý ońaı sharýa bolmaı tur. Qazaqta «Úsh jyldyǵyn oılamaǵan erkekten bez...» degen sóz bar. Al bul sheneýnikter úsh jyl túgili, kelesi jyldyń dárilerin de úzdiksiz alyp turýdy oılaı qoımaıtyn sııaqty. Sonda aýrý adam dári ishpeýi kerek pe, álde az ǵana zeınetaqysynan jyryp dári satyp alýy kerek pe? Mysaly, men kúnine bes-alty túrli dári ishemin. Dárihana bermegen soń dárilerdi satyp alýǵa májbúr bola bastadym. Ár dáriniń quny úsh myń teńgege taıaý. Esepteı berińiz...
Ekinshi másele, tabanjoldardyń asa taıǵaq ekeni. Jaıaý júrý múmkin emes. Men amalsyzdan kólik júretin joldyń shetimen júrýge tyrysamyn. Bir jaǵynan kólik qaǵyp ketpes pe eken dep qorqamyn. Jol qyzmetiniń bir jumysshysynan nege jaıaý júrginshilerdiń jolyn muzdan tazartpaısyńdar dep surap edim, problemany bilemiz, tuz joq, degen jaýap aldym. Elimizde, jalpy álemde ne kóp, tuz kóp emes pe?!
Bizde bir jaman ádet bar, oqıǵa bolǵannan keıin ǵana oılana bastaımyz. Bul jaǵdaıda da biraz adamnyń qulap, maıyp bolýyn tosyp júrgen sııaqtymyz. Jolǵa jaýap beretin basshylar úkimet adamdary ǵoı, olar el Prezıdentiniń halyqty estıtin memleket quraıyq. Úkimet adamdary halyqtyń muń-muqtajyna qulaq qoıyp, tez arada sheshý joldaryn qarastyrýlary tıis, degen sózderin estimeı me álde?
Osyndaı kemshilikterdi ár saladan tabýǵa bolady. Sondyqtan óz isine jaýapsyz basshylardan qutylý kerek nemese olarǵa qatysty qatań sharalar qoldaný qajet. Ásirese astana basqa qalalarǵa úlgi bolýy kerek qoı. Muny meniń qala turǵyny retindegi janaıqaıym dep túsinińizder.
Hamıla QULBEKQYZY,
zeınetker
NUR-SULTAN
