Qazaqstannyń azamaty retinde, ana retinde, qoǵam ókili retinde meni de elimniń búgini men bolashaǵy oılandyrady, mazalaıdy. Osy oraıda Prezıdenttiń «Maǵan elimniń amandyǵy men jerimniń tutastyǵynan asqan qundylyq joq» degen sózi unady. О́skeleń urpaq tárbıesimen shuǵyldanyp júrgendikten, «Otanshyldyq rýhy joǵary el kózdegen maqsatyna qalaıda jetedi», degen Prezıdenttiń sózinen memlekettiń bolashaq azamattaryn, qoǵamnyń bolashaq ókilderin – jas urpaqty otansúıgishtik rýhta tárbıeleý máselesine nazar aýdarýdyń mańyzyn tereń sezindim.
Prezıdenttiń bizge eshkim syrttan kelip, eshteńe jasap bermeıtini anyq, bári óz qolymyzda», degen sózimen tolyq kelisemin. Aınalań ózgersin, qoǵam ózgersin, el ózgersin deseń, synap-mineı bermeı, árbir azamat «Osy kemshilikti túzeý úshin men ne isteı alamyn, ne istep júrmin?» degen oımen ózgeristi ózinen bastaǵan jón.
Bul Joldaýdyń bılik úshin de, halyq úshin de júgi aýyr. Qazaqstannyń bolashaǵyn, el keleshegin oılasaq, «Ár urpaq ózine artqan júkti jeter jerine aparyp tastaýy kerek. Áıtpegende bolashaq urpaǵymyzǵa asa kóp júk qaldyryp ketemiz», dep Álıhan Bókeıhan aıtpaqshy, bılik te, halyq ta arqamyzdaǵy aýyr júkti birlese jumyla kóterip, keıingi urpaqqa tuǵyrly táýelsizdigi bar, kemel memleket qaldyryp ketýimiz kerek.
Turar SÁTTARQYZY,
etnologııa magıstri,
Qazaqstan halqy Assambleıasy Nur-Sultan qalasy Analar keńesiniń múshesi
