Kelesi kúni tótenshe jaǵdaı jónindegi komıssııanyń shuǵyl otyrysy ótti. Belgili bolǵandaı, daýyldan keltirilgen shyǵyn men ómir súrý qyzmetiniń júıesin qalpyna keltirý boıynsha jedel shtab qurylǵan. Oblystyq tótenshe jaǵdaılar departamentiniń basshysy Jasulan Jumashevtiń aıtýynsha, tabıǵattyń tosyn minezi saldarynan 14 bilim berý jáne 1 densaýlyq saqtaý nysanynyń shatyry julynǵan. Ásirese Ekibastuz qalasynyń aýyldyq aımaqtaryndaǵy áleýmettik ǵımarattar kóp japa shekken. Tórtúı aýylynda ornalasqan ekiqabatty Ekibastuz orta mektebinde shatyrdyń 40 sharshy metri, Solnechnyı kentinde úshqabatty, eki bloktan turatyn №28 orta mektep tóbesiniń shamamen 300 sharshy metri, Qoıandy aýyldyq okrýgi Besqaýǵa aýylynda №25 orta mektep shatyrynyń shamamen 37 sharshy metri, Ekibastuz qalasyndaǵy №7 mektep-gımnazııasy shatyrynyń 350 sharshy metr aýmaǵy julynypty. Al Baıanaýyl aýdany Uzynbulaq aýylyndaǵy qos qabatty E.Bekmahanov atyndaǵy orta mekteptiń 80 sharshy metrdi quraıtyn shatyry ushyp ketken. Sondaı-aq shıferdiń qulaýy saldarynan eki plastıkalyq tereze synǵan. Aqtoǵaı aýdanynda «ALAÝ» hokkeı korty shatyrynyń 1 600 sharshy metr aýmaǵy qıraǵan. Ekpindi jel Aqtoǵaı aýdandyq aýrýhanasy ǵımaratynyń 600 sharshy metrdi quraıtyn shatyryn da ushyryp áketken. Bastysy – adam shyǵyny joq.
Aýa raıynyń nasharlaýyna baılanysty óńir aýmaǵynda avtojoldardyń 19 ýchaskesi jabyldy. Onyń jeteýi – respýblıkalyq mańyzy bar joldar. Avtojoldardyń jabyq ýchaskelerinde 14 jylytý pýnkti iske qosylǵan. Oǵan 40 adam ornalastyrylǵan. Onyń 11-i – balalar. Kólikterge arnalǵan beketterge 110 tehnıka kirgizilipti. Avtojoldardy qardan tazalaýǵa 23 tehnıka jumyldyrylǵan.
Qatty jeldiń saldarynan Aqtoǵaı, Baıanaýyl, Ýspen, Ertis aýdandary men Aqsý qalasynyń aýyldyq aımaqtaryndaǵy birqatar eldi mekende elektr energııasynyń apattyq óshýi oryn alǵan. Sondaı-aq oblys ortalyǵyndaǵy birneshe shaǵynaýdandardaǵy úıler men №19 balabaqsha jaryqsyz qalypty. Tótenshe jaǵdaı jónindegi komıssııanyń shuǵyl otyrysynda oblys ákimi Ábilqaıyr Sqaqov qalalar men aýdandardyń basshylaryna jedel áreket etý algorıtmin quryp, shyǵynnyń kólemin anyqtaýdy tapsyrdy. Shyǵyndy qalpyna keltirý boıynsha rezervten aqshalaı qarajat bólý týraly da aıtty.
Pavlodar oblysy
