Eń tómengi jetkiliktilik shegi ósedi

Eń tómengi jetkiliktilik shegi dep otyrǵanymyz – zeınetaqy jınaǵynyń belgili bir somadan asqan bóligi. Ony turǵyn úı jaǵdaıyn jaqsartýǵa nemese emdelýge paıdalanýǵa bolady. Eń tómengi jet­kiliktilik shegin enpf.kz saıty nemese Biryńǵaı jınaqtaýshy zeınetaqy qorynyń mobıldi qosym­sha­sy arqyly, sondaı-aq egov portaly men mobıldi qosymshasy arqyly tekserýge bolady.

Salymshy shekti somadan artylǵan zeınetaqy jınaǵynyń bir bóligin paıdalaný týraly sheshim qabyldaǵan jaǵdaıda, ýákiletti operatorlardyń ınternet-resýrsy arqyly aldyn ala ótinim be­redi. Búginde turǵyn úı jaǵdaıyn jaqsartýǵa arnalǵan birjolǵy zeınetaqy tólemderine ótinish qabyldaıtyn ýákiletti operatorlardyń qatarynda Otbasy bank, «Halyq bank», Altyn Bank, «Bank SentrKredıt» jáne «Bank Frıdom Fınans Qa­zaqstan» bar. Al emdelýge arnalǵan ótinishterdi Otbasy bank qabyldaıdy.

Ýákiletti operator birjolǵy zeınetaqy tólemin alý týraly ótinishti qaraǵannan keıin eki jumys kúni ishinde BJZQ-ǵa elektrondy habarlama jibe­redi. BJZQ tarapynan alýǵa qoljetimdi qara­jat ýákiletti operatordan elektrondy habarlama kelip túsken kúngi eń tómengi jetkiliktilik shegi bo­ıynsha tekseriledi. Odan keıin BJZQ bes jumys kúni ishinde alýshynyń arnaıy shotyna birjolǵy zeınetaqy tólemin aýdarady.

Osy oraıda bıylǵa arnalǵan eń tómengi jet­ki­lik­tilik shegi osy jyldyń 1 sáýirinen bastap kúshine enetindikten, zeınetaqy qory ýákiletti operatorlardan BJZQ-ǵa 2022 jyldyń 31 naýryzyna (qosa alǵanda) deıin kelip túsken ótinishter boıynsha birjolǵy zeınetaqy tólemderin júrgizedi. Iаǵnı 31 naýryzǵa deıingi ótinishterdiń bári 2021 jylǵa arnalǵan eń tómengi jetkiliktilik shegine sáıkes esepteledi.

«Zeınetaqymen qamsyzdandyrý týraly» Zań­da eń tómengi jetkiliktilik shegi Úkimet bekit­ken ádis­te­mege sáıkes aıqyndalǵan mindetti zeınetaqy jarnalary jáne mindetti kásiptik zeınetaqy jarnalary esebinen qalyptastyrylǵan zeınetaqy jınaqtarynyń eń tómengi mólsheri dep aıqyndalǵan. Onyń aıqyndaý ádistemesi Úkimettiń 2013 jylǵy 2 qazandaǵy qaýlysymen (2021 jylǵy 6 qańtarda ózgerister men tolyqtyrýlar engizildi) be­ki­tilgen.

Ádistemege sáıkes, eń tómengi jetkiliktilik she­gi jyl saıyn ár jas úshin esepteledi jáne bo­la­shaq zeınetaqy tólemderi men zeınetaqy jar­na­larynyń ósýin (ındekstelýin) eskeredi. Bul rette «Respýblıkalyq bıýdjet týraly» Zańǵa sáıkes jyl saıyn ındeksteletin eń tómengi jalaqy, eń tó­mengi zeınetaqy, bazalyq zeınetaqy tóleminiń eń tó­mengi mólsheri sııaqty áleýmettik kórsetkishter paı­dalanylady.