Alańdaýǵa esh negiz joq

Reseıdiń beıbit turǵyndary arasynda da dúrbeleń bar. Reseıden kóshýge bet alǵan halyqtyń aldymen bet alatyn jeriniń biri Qazaqstan ekeni daýsyz. Osyǵan oraı áleýmettik jelide ártúrli qaýeset qaptap ketti. Olardyń kóbinde bizdiń eldiń aýmaǵyna reseılikterdiń kóptep engenine qarsylyqtar aıtylady. Onyń ústine qazir Reseı Federasııasy Qazaqstan men Mońǵolııaǵa jermen ótetinder úshin barlyq kedergini alyp tastady. Al basqa memleketterge ótý áli de shekteýli. Aldynda Eńbek jáne halyqty áleýmettik qorǵaý mınıstri Erjan Birjanov 30 naýryzdaǵy málimetke qaraǵanda Qazaqstanda 101 myń reseılik júrgenin aıtqan edi.

Osyǵan oraı biz Soltústik Qazaq­stan oblysy PD Kóshi-qon qyzmeti basqar­masyna habarlasyp, kóship kelýshiler týraly málimet alǵan edik. Málimetterge qaraǵanda, másele sonshalyqty kúrdeli emes, qalyptaǵydan sonshalyqty aýytqý joq.

Soltústik Qazaqstan oblysy PD Kóshi-qon basqarmasynyń bastyǵy, podpolkovnık T.Ábilevten alynǵan máli­met bıyl jyldyń 1 qańtar men 30 naýryz aralyǵynda Reseı Federasııasynan Soltústik Qazaqstan oblysyna 915 reseılik azamattyń ótke­nin aıtady. Al ótken jyldyń sáıkes mer­ziminde bul san 984 bolǵan eken. Kel­gender ne maqsatpen kirdi degen saýalǵa mynadaı jaýap aldyq: jumys babymen – 581 adam, otbasymen birigý úshin – 243 adam, oqý maqsatymen 26 jáne t.b. kelgen. Al turaqty turýdy maqsat etip kel­gender sany – 32. 2021 jyldyń sáı­kes merziminde bul san 39 bolǵan. Árı­ne, kelý maqsatyn jasyryp, teris kórsete­tinder kóp bolady. Biraq qalaı desek te, atalǵan merzimde kirgender sany byl­tyrǵydan kóp emes ekenin kóremiz.

Kóshi-qon qyzmeti bizge Eýrazııalyq ekonomıkalyq odaqqa qatysýshy elder azamattarynyń Qazaqstan Respýb­lıkasynda bolýyna ruqsat etilgen merzim – 90 kún ekenin aıtty. Al bul mer­zimnen úsh kún asqanda eskertý jasalady, bes táýlik bolsa 10 AEK kóleminde, al bes táýlikten asyp on táýlikke jetse 15 AEK mólsherinde aıyppul saly­nady eken. Al on táýlikten assa 25 AEK mólsherinde aıyppul salynyp, ákimshilik jolmen shekaradan kúshpen shyǵaryp jiberiledi. 

Kóshi-qon qyzmetiniń deregine qarasaq, Soltústik Qazaqstan oblysynan Reseı Federasııasyna 1 qańtar men 30 naýryz aralyǵynda turaqty turý úshin 363 azamat kóshken. О́tken jyldyń sáı­kes merziminde bul san 348 bolǵan edi.

Atalǵan merzimde Reseıden kelgen­der arasynan Qazaqstan Respýblı­kasynyń azamattyǵyn alýǵa 18 adam ótinish jasa­ǵan. Al byltyr osy mer­zimde ótinish jasaǵandar sany 27 bolǵan. Aıta ketetin jaıt, 2021 jyly Soltústik Qazaqstan obly­synan Reseı Federasııasyna turaq­ty turýǵa bar­lyǵy 2 110 azamat ket­ken. Al Reseı­den Soltústik Qazaq­stan oblysyna turaq­ty turýǵa 329 aza­mat tirkelgen. Sony­men qatar byltyr bar­lyǵy 110 adam Qa­zaq­­stan Respýblıkasynyń azamat­tyǵyn alǵan.

Derekterge qaraǵanda, «reseılikter Soltústik Qazaqstanǵa qaptap kelip jatyr» degen dúrbeleńge esh negiz joq. Kóshelerde syrttan kelip jatqan bóten adamdarǵa kezdespedik. Sondyqtan jel sózge ermeı, sabyrly bolaıyq, aǵaıyn.

Soltústik Qazaqstan oblysy