Eń bastysy, danyshpan, dana Abaı dańqy taǵy bir asqaqtady. Jer jánnaty Jetisý qanatyn qaıta jaıdy. Ult uıasy Ulytaý tarıh sahnasyna shyqty. Jańa oblystardyń aty da, zaty da – qazaq baıtaǵynyń ulylyǵyn, keń shalqar peıilin, baılyq-berekesin, yrys-yntymaǵyn pash etkendeı, barynsha kózge ystyq, júrekke jaqyn ataýlar. Sondaı-aq Qapshaǵaı qalasynyń halqymyzdyń taý tulǵalarynyń biri, aıaýly Dinmuhamed Ahmetuly Qonaev esimimen atalýy da kópshiliktiń kópten kókeıinde júrgen qalaýly bir shara edi. Onyń da oraıy endi keldi.
Qaraǵandy, Jezqazǵan óńirinde turǵyndarmen kezdeskende, el aǵalarymen pikirleskende osy máselelerge jıi nazar aýdarylýshy edi. Esti azamattardyń barlyǵy derlik túrli sebeptermen biraz tusalyp, toqyrap qalǵan el tirshiligine nár berýdiń, jan bitirýdiń qasqa bir joly osy degen oıǵa taban tireı berýshi edi. Memleket basshysy osy talap-tilekterdiń tamyryn tap basty. Aq túıeniń qarny jarylǵandaı, aspannan shuǵa jaýǵandaı, aq jarylqap kún boldy bul!
Keıbir keritartpa aǵaıyndar osynsha jańa qurylymdardyń el ekonomıkasyna áseri qalaı bolady degendi de aıtyp jatyr. Menińshe, oń, tek oń áseri bolady! Máselen, Jezqazǵan oblys mártebesinen aıyrylǵaly beri eptep etek-jeńin jınap alǵan «Qazaqmys» syndy alpaýyt kásiporyndar qaıta qaıyrylyp, jańasha jaǵdaıda, tyń qarqynmen eńbek etetini sózsiz. Sonymen qatar oń ózgerister Ulytaýǵa irgeles jatqan Qyzylorda oblysy, Torǵaı-Arqalyq aýmaǵyn da qamtymaq. Kásipkerlikke jan-jaqty qoldaý kórsetilip, jańa jumys oryndary kóptep ashylady. Qańyrap qalǵan qalaǵa el oralady, týsyrap jatqan dalaǵa mal tolady, eńbek dabyly qaıta qaǵylady. Bir sózben, bul sheshimderdiń strategııalyq mán-mańyzy erekshe.
Memleket basshysy eldiń aldaǵy áleýmettik-ekonomıkalyq damýynyń negizgi baǵyttary týraly tarqatyp aıta kelip, qorytyndy sózinde: «Men úshin eń bastysy – eldiń amandyǵy, jerdiń tutastyǵy. Táýelsizdikti turaqty, baıandy etýdiń birden bir kilti osy eki ustyn» dep atap kórsetti. Qazirgi kúrdeli jaǵdaıda aldymyzda turǵan basty mindet – saıası, áleýmettik-ekonomıkalyq turaqtylyqty, jumys oryndaryn jáne halyqtyń áleýetin, ál-aýqatyn saqtap qalý. Sol turǵyda basym baǵyttar aıqyndaldy, naqtyly tapsyrmalar berildi. Endi sony júzege asyrý maqsatynda jumyla jumys júrgizý ǵana qaldy.
Nurlan DÝLATBEKOV,
UǴA korrespondent-múshesi, zań ǵylymdarynyń doktory,
akademık E.A.Bóketov atyndaǵy Qaraǵandy ýnıversıtetiniń rektory
QARAǴANDY
