Máselen, «Strategııa» áleýmettik jáne saıası zertteýler ortalyǵy» qoǵamdyq qory dep atalatyn bizdiń uıym atalǵan reformalardyń baǵyty, mazmuny máselesine qatysty sarapshylardyń pikirin zerttedi. Sondyqtan, bul baǵytta qandaı jumys júrgizilgenin jaqsy bilemin.
Alaıda bul bastamalardyń bolashaǵy qandaı bolatynyn naqty kesip-piship aıtý qıyn. Sebebi saıası reformany turǵyndardyń belgili bir bóligi ǵana kútip otyr. Qarapaıym adamdar saıası ózgeristerdiń máni men mańyzyn túsine bermeıdi. Alaıda naq osy saıası reformalar túptep kelgende otandastarymyzdyń, siz ben bizdiń ómirimizge áser etedi. Biraq birden áser etedi dep aıtý qıyn. Sondyqtan halyq Prezıdenttiń bul qadamdaryn jiti túsingeni asa mańyzdy.
Al endi, partııa qurý máselesine keletin bolsaq, tirkeý shegin 5 myń adamǵa deıin azaıtýdy zertteý kezinde sarapshylar da qoldady. Sarapshylardyń basym kópshiligi tirkeý sheginiń osy kólemin qup kórdi. Saıası partııalardyń arasynda báseke bolýy tıis. Sebebi bul sala kóp jyldan beri turalap turǵan bolatyn. Meniń oıymsha, dál qazir Májiliske kirý shegin ózgertýge bolmaıdy. Jańadan qurylatyn partııalar eń aldymen elektorat sanyn arttyryp alýǵa tıis. Mundaı sheshimdi kelesi qadam retinde de qaraýǵa bolady.
Kóp jyldan beri burynǵy Semeı oblysynda zertteý júrgizdik. Burynǵy Jezqazǵan nemese Taldyqorǵan oblystaryna qaraǵanda semeılikter oblys mártebesinen aıyrylǵandarymen kelisken joq. Jeke oblys bolyp qaıta qurylýyn jıyrma jyldan astam ýaqyt talap etip keledi. Osy jyldar aralyǵynda burynǵy Semeı oblysynyń ekonomıkasy quldyrap ketti. Semeı qalasy da damymaı qaldy. Sondyqtan Prezıdenttiń mundaı sheshimin tolyǵymen qoldaımyn. Árıne, jańa oblys qurý úshin de kóp jumys atqarylýy kerek. Eń bastysy, sheshim qabyldandy. Jańadan Abaı oblysy paıda bolady. Qalǵany rettele jataryna senimdimin.
Memleket basshysy qańtar oqıǵasynyń oryn alýyna sebep boldy dep jemqorlyqty, nepotızmdi aıyptady. Al ony jeńý jańadan oblys qurý men partııalyq júıeni jańǵyrtýdan da qıyn bolatyn sekildi. Máselen, Joldaýdy ákimdermen, kvazımemlekettik sektordyń ókilderimen, quqyq qorǵaý organdarynyń qyzmetkerlerimen birge otyryp tyńdadym. Bir baıqaǵanym, kóbisi qol soǵyp, qoshemet bildirip otyrǵan joq. Ishteı qandaı da bir qarsylyqtary bar ekeni ańǵarylady. Al Prezıdent bastamalarynyń tıimdi iske asýy men aspaýy dál osyndaı joǵary, orta laýazymdaǵy sheneýnikterdiń áreketimen tikeleı baılanysty ekeni aıtpasa da belgili. Sondyqtan aldaǵy ýaqytta aýyr, aýqymdy jumystar atqarylyp, tyń qadamdar jasalatyny anyq.
Gúlmıra ILEÝOVA,
«Strategııa» áleýmettik jáne saıası zertteýler ortalyǵy» qoǵamdyq qorynyń prezıdenti
