Joǵarǵy Sot Qaraǵandy turǵynynyń daýly páterin zańdastyryp berdi

Sýdıalardyń qashanda bilimdi, bilikti, únemi qara qyldy qaq jara alatyn  adal da ádil bolýyn talap etetin Memleket basshysynyń jyl saıynǵy Joldaýlaryndaǵy mindetterdi oryndaý jolyna qoıǵan Joǵarǵy Sottyń  azamattyq jáne ákimshilik ister jónindegi qadaǵalaýshy sot alqasy Shahtınsk qalasynyń 73 jastaǵy turǵyny E.S. Pervaktyń  turǵyn úıge quqyǵyn taný týraly ótinishin qanaǵattandyrdy. Bul týraly Egemen.kz habarlady. Másele bylaı bolǵan edi. Qaraǵandy oblysynyń Shahtınsk qalasynyń ákimi Qaraǵandy oblysynyń Shahtınsk qalalyq sotyna K-ge jyljymaıtyn múlikke menshik quqyǵyn toqtatý  jáne úıdi kommýnaldyq menshikke berildi dep taný týraly talap aryzben júgindi. Al K. bolsa daýly páterden shyǵarý týraly E.S. Pervakqa qarsy talap qoıdy. Artynsha Qaraǵandy oblysynyń sot satylary Shahtınsk qalasy ákiminiń talap aryzyn qanaǵattandyrýdan bas tartty, biraq K-niń qarsy talaby qanaǵattandyryldy. Muny óz kezeginde qaraǵan Joǵarǵy Sottyń azamattyq jáne ákimshilik ister jónindegi qadaǵalaýshy sot alqasy barlyq shyǵarylǵan sot aktileriniń kúshin joıyp, ákimniń talap aryzyn qanaǵattandyrý jáne K-niń qarsy talabynan bas tartý týraly jańa sheshim shyǵardy. Joǵarǵy Sot 1992 jylǵy 10 shildedegi páterdi satý-satyp alý týraly sharttyń negizinde daýly páterdiń ıesi K. bolyp tabylatyndyǵyn belgiledi. 1997 jyldan bastap qazirgi ýaqytqa deıin daýly páterde E.S.Pervak turyp, osy múlikti kútip ustaý boıynsha aýyrtpalyqty kóterip kelgen.  Al 2007 jylǵy 2 mamyrda daýly páterge «ıesiz» sanaty boıynsha derelıksııa salynǵan. Buǵan qosa, 2013 jylǵy 4 mamyrda is boıynsha sot sheshim qabyldaǵanǵa deıin tórt kún buryn páterdiń ıesi – azamat K-niń júginýine baılanysty daýly páter «ıesiz» sanaty boıynsha esepten alynyp tastalǵan. Ákimniń talap aryzyn qanaǵattandyrýdan bas tartqan jergilikti sottar óz tujyrymdaryn sot páterdi ıesiz jáne ony kommýnaldyq menshikke berý týraly sheshim shyǵarǵanǵa deıin ıesi tabylsa, ol  derelıksııany alyp tastaýǵa jáne páterdi is júzinde ıelenýge quqyly ekenimen túsindiredi. Degenmen, qadaǵalaýshy sot alqasy sottardyń bul tujyrymdaryn zańsyz ári negizsiz dep tanydy. «Menshik ıesimen tastalǵan turǵyn úıge quqyq jónindegi daýlardy sottardyń qaraý praktıkasy týraly» Joǵarǵy Sottyń 2006 jylǵy 20 sáýirdegi № 3 normatıvtik qaýlysynyń 6-tarmaǵyna sáıkes, menshik quqyǵyn saqtaý nıetin dáleldeıtin áreket jasamaǵan menshik ıesi tastap ketken turǵyn úı tastalǵan (nemese qaldyryp ketken) turǵyn úı dep atalady. Mundaı turǵyn úılerge menshik ıesimen qaraýsyz qaldyrylǵan, úıdi kútip ustaý jónindegi jáne taǵy da basqa mindetterin oryndamaı tastalǵan bos turǵyn úıler jatady. Al K. daýly páterdi satyp alǵan sátten bastap onda turmaǵan, múlikti kútip ustaý boıynsha áreket jasamaǵan, munyń nátıjesinde páter jartylaı buzylǵan kúıde bolǵan. E.S. Pervak Shahtınsk qalasy ákiminiń kelisimi boıynsha daýly páterge kirip, ony jóndegen jáne osy ýaqytqa deıin múlikti kútip ustaý boıynsha shyǵyndardy kóterip keledi. Kerisinshe 20 jyl boıy K. daýly páterge quqyǵyn málimdemegen, mundaı talaptardy ol ákim talap aryzdy bergennen keıin ǵana usyndy. Mine, osyndaı naqty derekter bolǵasyn Joǵarǵy Sot E.S. Pervaktyń daýly páterde zańdy túrde turyp jatqandyǵyn jáne shyǵarýǵa jatpaıtyndyǵy týraly negizdi tujyrymǵa kelgen kórinedi. Sóıtip E. Prevaktyń turǵyn úıde turý quqyǵy qorǵaldy. Aleksandar Tasbolatov. Derekkóz: Egemen.kz. Foto: www. Newskaz.ru.