«Bizdiń aýrýhanaǵa naýqas A.Orazbekova shuǵyl túrde óte aýyr jaǵdaıda ekijaqty vırýstyq pnevmonııamen jáne ókpe tininiń jalpy – 100% zaqymdanýymen tústi», dedi №2 kópbeıindi qalalyq aýrýhana dırektory Nurbol Tursynbaev.
Jansaqtaý bólimshesinde ananyń ómiri úshin dárigerler eki aı kúresti.
«Bosanǵannan keıin naýqastyń jaǵdaıy nasharlady: satýrasııasy tómen, temperatýrasy joǵary, ózdiginen dem ala almady, ıntoksıkasııa sındromy saqtaldy. Birneshe ret konsılıým júrgizildi, nátıjesinde, pasıent EKMO-ǵa (ekstrakorporaldy membranalyq oksıgenasııa) qosyldy. 20 kún boıy oksıgenasııa jáne gemodıafıltrasııa júrgizildi», dep tolyqtyrdy shuǵyl kardıologııa jáne kardıohırýrgııa ortalyǵynyń basshysy Seıil Muhametqalıev.
Naýqas ottegi terapııasyna qosylǵanyna qaramastan, onyń desatýrasııasy ózgermedi. Sondyqtan konsılıýmnyń sheshimi boıynsha naýqas О́JJ apparatyna aýystyryldy.
«Eki aı boıy dárigerler men meıirgerler naýqasty emdep, barynsha kútti. Kóp uzamaı aýyr ótken otanyń – joǵary tehnologııalyq medısınalyq qyzmettiń nátıjesi bárimizdi qýantty. 50 táýlikten keıin pasıent reanımasııadan beıindi bólimshege aýystyryldy. Bizdiń aýrýhana mamandarynyń komandalyq jumysynyń arqasynda naýqastyń jalpy jaǵdaıy jaqsardy, gemodınamıkasy turaqtandy, eń bastysy, ol óz betinshe tynys alady», dedi ınfeksııalyq bloktyń meńgerýshisi Gúlnur Ashırbekova.
«Aınagúl úshin týysymyzdaı alańdadyq. Bizdi kúıeýiniń dárigerlerge tolyq senim artyp, bári jaqsy bolatynyna nyq sengeni shabyttandyrdy», dedi emdeýshi dáriger, pýlmonolog Gúljan Baıyrbekova.
Aıta keteıik, medısınalyq qyzmetter MÁMS júıesinde júrgizildi. Saqtandyrylmaǵan azamat úshin mundaı ota men medısınalyq kómek 16 mln teńgeni qurar edi.
Aýrýhanadan jazylyp shyqqan Aınagúl dárigerler men meıirgerlerge, sanıtarlar men barlyq qyzmetkerlerge alǵysyn aıtty:
«Dárigerlerge, meıirgerlerge, sanıtarlarǵa jáne ARQTB jáne ınfeksııalyq bloktyń barlyq qyzmetkerlerine alǵys aıtamyn. Barshańyzdyń aldaryńyzda basymdy ıip, taǵzym etemin. Kórsetilgen kómek pen kásibı biliktilikterińiz úshin taǵy da rahmet. Bul sózderden basqa eshteńe aıta almaımyn, rızamyn. Tez sábıimdi qolyma alǵym keledi», dedi A.Orazbekova.
