Tótenshe jaǵdaılar departamenti qyzmetkerleri men Ulttyq gvardııa ulandary sý basý qaýpi bar jerlerden 100 adamdy qaýipsiz jerge kóshirdi. Qobda aýdanynyń Sarybulaq jáne О́tek aýyldary, Baıǵanın aýdany Qaraýylkeldi men Jarly eldi mekenderine, Mártók aýdanynyń ortalyǵyndaǵy úılerge sý kirdi.
Respýblıkalyq mańyzy bar «Aqtóbe-Atyraý – RF shekarasy (Astrahan)» tasjolynyń Baıǵanın aýdany Jarly aýylynyń tusyndaǵy bóligin tasqyn sý shaıyp ketip, eki táýlik boıy kúre jolda qatynas toqtap qaldy.
2 sáýirge qaraǵan túni Elek ózeniniń bir salasy Jińishke men Peschanka ózenderiniń deńgeıi kúrt kóterilip, Aqtóbe hrom qosyndylary zaýyty baý-baqsha ujymyna qarasty 15 úıdi sý basty. Tótenshe jaǵdaılar qyzmeti osy aýmaqtan 32 adamdy, onyń ishinde 10 balany alyp shyqty. Munymen bir kezde Maǵadjan orman sharýashylyǵy mekemesine qarasty baý-baqsha ujymyndaǵy turǵyn úılerden 22 adam qaýipsiz jerge kóshirildi. Osy aýmaqtyń bári de Aqtóbe qalasynyń irgesinen ótetin Elek ózenine óte jaqyn ornalasqan burynǵy saıajaı aýmaǵy. Bul Elek ózeniniń sońǵy on jyldan beri tasýy. Elek ózeni sońǵy ret 2011 jyly arnasynan asa tasyp, osy tóńirektegi úılerdiń bári sýǵa ketken edi.
Oblystyq tótenshe jaǵdaılar departamentiniń habarlaýynsha, oblys aýmaǵynda naýryzdyń sońǵy kúni aýa temperatýrasy kúrt joǵarylap, jerdiń betki qabatyndaǵy tońnyń jibip úlgermeýinen qar sýy jerge sińbeı, tóńirekke túgel jaıylǵan. Turǵyndar oblys ortalyǵyn erigen qar sýynyń basýyna qardyń ýaqtyly shyǵarylmaýy, jańadan salynǵan shaǵynaýdandarda sýaǵarlardyń bolmaýy jáne ózen-kólderdiń arnasy tazartylmaı, sýdyń tabıǵı arnalaryndaǵy ótkelderdiń qoqysqa tolýy sebep deıdi.
Keshe túnde qala irgesindegi Sazdy ózeni deńgeıi joǵarylap, Aqtóbe qalasynyń ortasyndaǵy kishi Sazdy ózenin de toltyryp jatyr. Sazdy ózeni bastaýyn Sazdy qoımasynan alady. Sońǵy tórt jyldan beri oblystaǵy Elek, Qarǵaly, Sazdy, Or, Yrǵyz, Jem, Temir ózenderiniń arnasy tarylyp, tipti keı jerleri bólinip-bólinip, keýip qalǵan edi. Aıta ketý kerek, eki kúnniń ishinde Aqtóbe oblysyndaǵy dalalyq ózenderdiń sýy kóterilip, arnasynan asyp, jaıylyp ketti. Ádette Aqtóbe oblysynda jyl saıyn sý tasý merzimi sáýirdiń 12-13-ne sáıkes keletin edi. Bul joly ózender arnasy erterek kóterilip barady.
Aqtóbe oblysy
