Úıreteri kóp úıirmelerdiń biri – VR-kıiz úıi. Ereksheligi sol, kıiz úıdegi zamanaýı tehnologııanyń kómegimen álemniń kez kelgen jerine saıahat jasaýǵa bolady. Kózińizge tetikteri kóp kózildirikti taǵasyz da, armandaǵan qalańyzǵa top ete qalasyz. Onyń ishinde О́skemen de bar. Saıahat onlaın bolǵanymen, shahardy shynaıy kezip júrgendeı kúıde bolady ekensiz. Oqyrmandardyń aıtýynsha, VR-kıiz úıi ashylǵan sátten bastap qyzyqqandar kóp boldy. Alǵashynda VR kózildirigi ǵana bolsa, keıin kitaphanadaǵy IT mamandary arnaıy baǵdarlamamen túrli kórinis jasaı bastaǵan. Kórinisterdiń kóbi – ańyz-ertegilerdegi keıipkerlerdiń beınesi.
– Bizdiń maqsatymyz – oqyrmanǵa oqyǵan kitaptaryndaǵy keıipkerlerdiń beınesin osy qurylǵy arqyly kórsetý. Osylaısha, jastardyń kitap oqýǵa degen yntasyn oıatqymyz keledi, – deıdi kitaphana basshysy Habıba Aqjigitova.
Iá, Habıba Myrzahanqyzynyń muryndyq bolýymen kıeli shańyraqta aýyz toltyryp aıtarlyqtaı jumystar atqarylǵanyn eshkim joqqa shyǵarmaıdy. Máselen, zamanaýı tehnologııa kómegimen Oralhan Bókeıdiń týǵan jerin jáne jazýshy shyǵarmalaryndaǵy keıipkerlerdiń obrazy beınelenip, oqyrman nazaryna usynyldy. Improvızasııa jasalyp, Oralhan Bókeı, Muhtar Áýezov jáne Sherhan Murtazanyń ústel basynda áńgimelesip otyrǵany da beınelendi. Sonymen qatar Oralhannyń «Kerbuǵy», «Qamshyger» shyǵarmalaryna ıllıýstrasııa jasaldy.
Taǵy bir erekshe jańalyq, balalardy kitap oqýǵa baýlý úshin mýltstýdııa ashylǵan. Búldirshinderdiń kóbi ertegini kitaptan emes, teledıdardan, smartfonnan izdeıtini shyndyq. Sondyqtan da Oralhan Bókeı kitaphanasynda mýltstýdııa iske qosylǵan. Atalǵan stýdııa qalaı jumys isteıdi deısiz ǵoı. Munda balalar qaǵazdan jasalǵan qýyrshaqtardy tehnıkanyń kómegimen jandandyrady eken. Keıin ertegi keıipkerlerine degen qyzyǵýshylyqtary oıanyp, kitap oqı bastaıdy. Kitaptaǵy keıipkerlerdi ǵana emes, balalar óz oıyndaǵy dúnıelerdi jasap, shyǵarmashylyqpen aınalysýlaryna da múmkindikteri bar.
Al tórdegi erekshe sensorly ústel tildik damýynda aqaýlary bar balalarǵa arnalǵan. Keıbir balalardyń tili kesh shyǵyp, ortasynan shettep qalyp jatady. Osyndaı olqylyqtyń aldyn alý úshin mamandar sensorly ústeldiń kómegimen bilim berýdiń jańa deńgeıine kóterilgen. Erekshe ústel betinde bala sýret sala otyryp, anyq sóıleýdi úırenedi. Mamandardyń sózine sensek, nátıjesi jaqsy.
Kitaphanada balalarǵa ǵana emes, eresek oqyrmandarǵa da qolaıly jaǵdaı qarastyrylǵan. Mysaly, «bokeylibrary.kz» saıtyna kirip, kitaphanadan izdegen kitabyńyzǵa, aqparatyńyzǵa onlaın túrde qol jetkize alasyz. Onyń ishinde bokey.kz bólimin bassańyz, Oralhan Bókeıge qatysty materıaldardy qashyqtan oqýǵa bolady. Munymen qoımaı, kitaphana mamandary zaman aǵymyna qaraı bokeylibrary.kz saıtynyń BOKEYMOBILE mobıldi qosymshasyn da iske qosyp qoıǵan. Demek Oralhan Bókeı atyndaǵy kitaphananyń qundy materıaldary sizdiń qolyńyzda. Qosymshada kitaphanaǵa jazylý, kitap brondaý, suraq-jaýap, kitaptar, aýdıokitaptar, oıyndar jáne úıirmeler kestesi syndy qyzmet túrleri kórsetiledi. Bul degenimiz, «Sıfrly Qazaqstan» memlekettik baǵdarlamasynyń aıqyn jemisi der edik.
О́skemen
