Sýretshi Rashıd Qulbatyrovtyń «Alataýdyń bókterinde» kartınasy muzbalaq Muqaǵalıdiń óleńin eske túsiredi.
«Tay deıtin alyp júrek,
Ana týǵan.
Men taýlyqpyn!
Taýdan men jaratylǵam». Shirkin, aqıyq aqynnyń osy eki tarmaǵynan-aq bar bolmysyn, ǵumyrlyq qaǵıdasyn kórýge bolady. Qarańyzshy, biz usynǵan týyndy da avtordyń jan áleminiń galereıasyn aıshyqtap turǵandaı.
Zamanaýı jas sýretshi Rashıd Qulbatyrovty tabıǵı landshafttar men qala ansambliniń zańdy «jyrlaýshysy» dep ataıdy. Ol qylqalammen jeńil ári sheberlikpen jumys isteı otyryp, Qazaqstan men Eýropanyń úlkendi-kishili qalalarynyń kórinisterin, qazaqtyń sheksiz jazıra dalasyn, Ile Alataýy taý jotalarynyń eń bıik shyńdaryn, Kaspıı teńiziniń peızajdaryn, sol sııaqty kóshpendilerdiń dástúrli aýyldarynyń kompozısııalaryn jazdy. Sýretker tabıǵatqa kelgende týyndylarynda tústik aksentter, boıaýlardyń ashyqtyǵy men qarqyndy jaǵylýy erekshe mánerli.
«Alataýdyń bókterinde» kartınasy realıstik janrda jazylǵan. О́zen jaǵasyndaǵy aǵashtar men bıik shópterdiń arasynda jylqylar, al olardyń ústinen alyp taýlar kórinedi. Taýlar munarlanǵan tumanmen kómkerilgen. Kún sáýlesi taýdyń tek aqbas shyńdaryna túsip tur.
Baqsańyz, qylqalam ıesi jumsaq boıaýlardy, kenepti reńk turǵysynan jeńil aýysýlardy paıdalanady. Ol osy arqyly beımaraldyq pen tynyshtyqqa qol jetkizedi. Al kenepten taýdy beıneleý úshin keń oryndy kompozısııany bóle otyryp, Alataýdyń aıbyndylyǵy men bókterleriniń ásem sýretin salady. Sýretshi óz týyndysynda týǵan ólkeniń sulýlyǵyn berip, tabıǵatqa degen sheksiz tańdanysyn kórsetedi.
