Serbııadaǵy jarysta el namysyn byltyrǵy álem chempıony Temirtas Júsipov, el birinshiliginiń jeńimpazy men júldegerleri Danııal Sábıt, Oljas Baınııazov, Samatáli Tóltaev jáne eresekter arasyna endi qosylyp jatqan birqatar jas boksshy qorǵady. Týrnırge qatysqan boksshylardyń azdyǵyna baılanysty irikteý kezeńderinde jerlesterimiz bir-birine qarsylas atanyp, fınalǵa deıin jigitterdiń qatary sırep qaldy. Atap aıtqanda, 51 kıloda judyryqtasqan Danııal Sábıt alǵashqy aınalymda Kenje Muratulyn 4:1 esebimen jeńse, 60 kılodaǵy Samatáli Tóltaev Bekzat Maǵjandy 5:0 nátıjesimen aıqyn utty. Al Ermahan Jaqpekov (71 kılo), Dıas Moljigitov (75 kılo), Erasyl Jaqpekov (80 kılo), Erhat Bekzat (92 kılo) jáne aýyr salmaqtaǵy Damır Toıbaı birinshi kezeńde-aq qarsylastarynan jeńilip, jarysty erte aıaqtaýǵa májbúr boldy.
Qorytyndysynda fınalǵa úsh-aq boksshymyz shyǵyp, onyń tek bireýi ǵana týrnır chempıony atandy. Onyń ózinde 63,5 kıloda óner kórsetken Muhamedsabyr Bazarbaıulynyń fınaldaǵy qarsylasy marokkolyq Ábdelhak Nadır rıngke shyqpaı qoıyp, jerlesimiz jekpe-jeksiz bas júldeni enshiledi. О́kinishke qaraı, 54 kıloda baq synaǵan Oljas Baınııazov pen 75 kılodaǵy Ilııar Áshirov fınalda jarys qojaıyny serbııalyq boksshylardan jeńilip, kúmis medaldy qanaǵat tutty. Bul jarysta jerlesterimiz jalpy sany 12 júlde jeńip aldy.
Al negizgi quram boksshylary qatysyp jatqan Taılandtaǵy týrnırde Qazaqstan ulttyq quramasynyń 11 boksshysy óner kórsetýde. Bul jaqta da jerebe nátıjesi boıynsha jerlesterimiz jarystyń alǵashqy kúninen bastap bir-birimen sharshy alańda kezdesti. Máselen, álem chempıony, Olımpıadanyń qola júldegeri Sáken Bıbosynov alǵashqy kezdesýinde jastar arasyndaǵy álem chempıony otandasymyz Sanjar Táshkenbaımen kezdesip, tóreshilerdiń biraýyzdan shyǵarǵan sheshimimen jeńiske jetti. S.Bıbosynov shırek fınalda sharshy alań ıesi taılandtyq Tanarat Saenfetpen kezdesedi.
Sonymen qatar 2021 jylǵy álem chempıonatynyń kúmis júldegeri Serik Temirjanov ta alǵashqy jekpe-jegin sátti bastady. 57 kılo salmaqta synǵa túsken boksshy birinshi aınalymda fılıppındik Marıo Fernandesten aılasyn asyrdy. Endi ol jartylaı fınalǵa joldama beretin aıqasta sıngapýrlik Mohamed Hanýrdın Bın Hamıdpen judyryqtasady. 75 kılodaǵy Aıatolla Tákijanov alǵashqy aıqasyn taılandtyq boksshy Sıtıksak Chýmkýmarnommen ótkizip, qarsylasyn esh qıyndyqsyz tize búktirdi. Ol kelesi kezeńde alań qojaıyny Borvorn Kadamovanmen kúsh synasady.
2018 jylǵy jastar arasyndaǵy álem chempıony Nurbek Oralbaı (80 kılo) Thailand Open halyqaralyq týrnırinde merziminen buryn júldeger atandy. Jerebege sáıkes otandasymyz á degennen jarystyń jartylaı fınalyna joldama aldy. Otandasymyz fınal joldamasyn jańazelandııalyq Onıks Lı men taılandtyq Anavat Tongkatok jubynyń jeńimpazymen sarapqa salady.
Joǵarydaǵy boksshylardan bólek atalǵan jarysta Olımpıada baǵdarlamasyna engen salmaq dárejesi boıynsha Sanatáli Tóltaev, Sultan Mýsınov (63,5 kılo), Aslanbek Shymbergenov (69 kılo), Tımýr Nurseıitov (75 kılo), Aıbek Oralbaı, Saǵyndyq Toǵambaı (91 kılo) baq synaıdy. Taılandtyń Phýket qalasynda ótip jatqan halyqaralyq týrnır 10 sáýirge deıin jalǵasady.
