Respýblıka boıynsha orta eseppen halyqtyń 35%-y sportpen aınalysýǵa tartylǵan. Mańǵystaý, Atyraý jáne Aqmola oblystarynyń kórsetkishteri joǵary. Respýblıkalyq mańyzy bar qalalarda sportpen shuǵyldanýshylar Nur-Sultan, Almaty jáne Shymkent qalalarynda az.
«2025 jyly sportpen shuǵyldanýshylar sanyn 50%-ǵa deıin jetkizýimiz kerek. Bul kórsetkishke qol jetkizý salaýatty ómir salty men sporttyń paıdasyn nasıhattaý, syrqattanýshylyqtyń aldyn alý, sporttyq ınfraqurylymdy keńeıtý jáne, árıne, buqaralyq sport salasyn qarjylandyrýdy ulǵaıtý boıynsha úlken jumysty talap etedi», dedi Álıhan Smaıylov Úkimet otyrysy barysynda .
Úkimet basshysynyń aıtýynsha, atalǵan maqsatta Memleket basshysynyń tapsyrmasy boıynsha kásibı sport túrinen buqaralyq sportqa 21 mlrd teńgege jýyq qarajat qaıta baǵdarlanǵan, onyń 6 mlrd teńgesi memlekettik sporttyq tapsyrysty qarjylandyrý úshin paıdalanylǵan.
«Memlekettik tapsyrys myńdaǵan balalarǵa sport seksııalarynda tegin aınalysýǵa múmkindik berdi. Seksııalarǵa barý shyǵystary bıýdjetten tólenedi. О́tken jyly respýblıka boıynsha mundaı múmkindikti 162 myń bala aldy. Al bıylǵy qamtý 275 myńǵa deıin jetedi. Memlekettik tapsyryspen qamtýdyń eń joǵary kórsetkishteri - Almaty qalasy men Almaty oblysynda. Aqtóbe jáne Soltústik Qazaqstan oblystary artta qalyp otyr. 4,9 mlrd teńge kólemindegi qaıta baǵyttalǵan qarajattyń bir bóligi sport ınfraqurylymyn salýǵa jáne jóndeýge baǵyttaldy», dedi Álıhan Smaıylov.
Sondaı-aq, Premer-Mınıstr atap ótkendeı, ótken jyly respýblıka boıynsha 41 dene shynyqtyrý-saýyqtyrý kesheni paıdalanýǵa berildi, onyń 32-si aýdan ortalyqtary men aýyldarda ashylǵan. Álıhan Smaıylov aýyldardy sport nusqaýshylarymen qamtamasyz etý máselesi sheshilip jatqanyn aıtty.
«Sportpen shuǵyldanatyn balalar sanynyń artýy jalpy ulttyń saýyǵýyna, sportpen kásibı túrde aınalysqysy keletinderdiń sanynyń keńeıýine, halyqaralyq arenada elimizdi dańqtaýǵa ákeledi. Buqaralyq sportty damytýdyń paıymy, qaǵıdattary men tásilderi 2025 jylǵa deıingi dene shynyqtyrý men sportty damytý tujyrymdamasynda kórinis tabady», dep tolyqtyrdy Úkimet basshysy.
Osyǵan baılanysty Álıhan Smaıylov:
- Mádenıet jáne sport mınıstrligi Bilim mınıstrligimen jáne ákimdiktermen birlesip, jergilikti bıýdjetten qosymsha qarajat bóle otyryp, balalardy tegin sport seksııalarymen qamtýdy;
- Mádenıet jáne sport mınıstrligi Bilim mınıstrligimen jáne ákimdiktermen birlesip, osy jyldyń 1 shildesine deıin muqtaj eldi mekenderde sporttyq ınfraqurylym salý josparyn qabyldaýdy;
- Densaýlyq saqtaý mınıstrligi Ulttyq ekonomıka, Aqparat mınıstrlikterimen jáne ákimdiktermen birlesip, salaýatty ómir saltyn nasıhattaý men qalyptastyrý, syrqattanýshylyqtyń aldyn alý jónindegi sharalardy kúsheıtýdi tapsyrdy.
