«Qaýipsiz aýla» – qala tynyshtyǵynyń kepili

Almaty qalasynyń ákimi Ahmetjan Esimovke memleket pen jekemenshik arasyndaǵy tyǵyz qarym-qatynasqa negizdelgen «Qaýipsiz aýla» baǵdarlamasy tanystyryldy. Qala basshysy atalmysh baǵ­dar­lamanyń mańyzyn aıta kelip, osyndaı ıgi ister arqyly keleshek­te kóptegen tosyn oqıǵalar men qylmystardyń aldyn alýǵa, qala aýdandaryndaǵy kópqabatty úı­ler­­diń tazalyǵy men jaı-kúıin jaq­­sartýǵa yqpal etetindigin jetkizdi. «Qala turǵyndarynyń qaýip­sizdik sharasyn qamtamasyz etetin beıne-baqylaý qurylǵylary árbir shaǵyn aýdan men jekelegen aýlalarda ornatylatyn bolady. Beınekameralardy ornatý isi áýeli mýnısıpaldy turǵyn úı keshenderi men jańadan boı kótergen ǵımarattar, jańa úıler men qala aýmaǵyna qosylǵan jańa qurylys nysandaryn qamtıdy. Qaýipsiz aýlany jetildire otyryp qaladaǵy tártip máselesin ny­ǵaıtamyz» dedi Ahmetjan Esimov. Jobanyń alǵashqy nusqasy Alataý aýdanynda boı kótergen «Aqbulaq» shaǵyn aýdanynda bastaý aldy. Sondaı-aq, qala basshysynyń aıtýynsha, halyq kóp shoǵyrlanatyn jer­ler men áleýmettik qyzmet kórsetý alańdaryna qoıylǵan beıne-baqylaý qurylǵylary ózi­niń oń nátıjesin berip otyr. Osy baǵ­darlamanyń alǵashqy usyny­lymyna qatysqan Almaty qalalyq Ishki ister basqarmasynyń basshysy Serik Kúdebaev beınekameralarmen tolyqtaı qamtylǵan kezde qalada oryn alatyn qylmystyq oqıǵalar reti 25-30 paıyzǵa tómendeıtindigin jetkizdi. Búgingi tańda qalalyq Ishki ister basqarmasymen jeke tur­ǵyn­dar arasyndaǵy kelisim ar­qy­ly birneshe beıne-baqylaý quryl­ǵylary jumys istep tur. Tirkelgen aýdandarda qylmys pen zań buzýshylyq birden kemigen. Qanat ESKENDIR, «Egemen Qazaqstan». ALMATY.