Tórtinshi týrdyń alǵashqy oıyny Aqtaýda jergilikti «Kaspıı» men Shymkenttiń «Ordabasy» klýbtary arasynda ótti. Keıingi úsh matchtyń ekeýinde jeńiske jetip, bireýinde teń oınaǵan «Kaspıı» fýtbolshylary bul joly da jeńis toıyn toılady. «Jas Qanat» stadıonyndaǵy oıynda alań ıeleri qarsylastarynan 2:1 esebimen basym túsip, týrnır kestesinde ýaqytsha kósh bastady. Syrt alańda «Tarazben» kezdesken «Atyraý» qarsylas komandany 1:0 esebimen tize búktirdi. Kezdesýdegi sheshýshi goldy birinshi taımnyń 42-mınýtynda «Atyraýdyń» jartylaı qorǵaýshysy Andrııa Fılıpovıch penaltıden soqty.
Al quramyn sheteldik jáne ulttyq quramada óner kórsetetin tájirıbeli fýtbolshylarmen jasaqtaǵan «Aqtóbe» bul týrda da jankúıerlerin qýanta almady. О́z alańynda Qaraǵandynyń «Shahterin» qabyldap, 1:1 esebimen teń tarqasty. Matchtyń esebin 78-mınýtta «Aqtóbe» sapynan Ýgo Vıdemon ashsa, 83-mınýtta «Shahterdiń» qorǵaýshysy Tımýr Dosmaǵambetov tarazy basyn teńestirdi.
Bıyl Eýrokýbok básekesine qatysatyn Petropavldyń «Qyzyljar» klýbynan ázirge byltyrǵydaı qarqyn baıqalmaıdy. Alǵashqy úsh týrda birde-bir upaı jınaı almaǵan Andreı Karpovıch shákirtteri tórtinshi týrda áreń degende alǵashqy jeńisine qol jetkizdi. О́z alańyndaǵy matchtaryn «Astana Arenada» ótkizip júrgen «Qyzyljar» «Aqsý» klýbyn qabyldap, 2:1 esebimen utty. Birinshi taımda Aıbol Ábikenniń penaltıden soqqan golyna alań ıelerinen Mýssa Saeb Kone men Iýrıı Býshman bir-bir golmen jaýap qaıtardy.
Tórtinshi týrdyń taǵy bir mańyzdy oıyny elordanyń «Astana» klýby men Túrkistan oblysynyń «Maqtaaral» komandasy arasynda ótti. Alǵashqy eki týrda jeńiliske ushyraǵan elimizdiń alty dúrkin chempıony syrt alańda «Maqtaaraldy» iri eseppen jeńdi – 3:0. Birinshi taımda «Astananyń» portýgalııalyq jartylaı qorǵaýshysy Pedrý Eýjenıý dýbldiń avtory atansa, ekinshi taımnyń 57-mınýtynda Marın Tomasov penaltıden gol soǵyp, oıynnyń núktesin qoıdy. Qatarynan ekinshi oıynda jeńiske jetken «Astana» týrnır kestesindegi jaǵdaıyn birshama jaqsartyp aldy.
Ekinshi oıyn kúniniń alǵashqy matchynda Almatynyń «Qaıraty» Oralda kútpegen jerde «Aqjaıyqpen» teń túsip (0:0), qatarynan ekinshi kezdesýinde upaı joǵaltty. Match tizgini tolyqtaı Qurban Berdyev shákirtteriniń qolynda bolǵanymen, «Qaırat» fýtbolshylary «Aqjaıyq» qaqpasyna gol soǵa almady. Tipti oıynnyń 88-mınýtynda oraldyq oıynshy Vıtalıı Prındeta ekinshi sary qaǵazyn alyp, alańnan qýylsa da almatylyq komanda odan nátıje shyǵara alǵan joq. Sóıtip chempıonat aýtsaıderiniń birimen upaı bólisken «Qaırat» segiz upaımen týrnır kestesinde úshinshi orynǵa syrǵydy.
Týrdyń sońǵy oıynynda Qostanaıdyń «Tobyly» óz jankúıerleriniń aldynda Túrkistannyń «Turan» klýbyn qabyldap, 3:0 esebimen jeńiske jetti. Alań ıeleri sapynan 19-mınýtta Zoran Toshıch penaltıden gol soqsa, ekinshi taımda Ashat Taǵybergen dýbl jasady. Tórt týrda 10 upaı jınaǵan «Tobyl» týrnır kestesinde top bastady. «Kaspııde» de 10 upaı bolǵanymen, aqtaýlyq komanda dop aıyrmashylyǵyna baılanysty ekinshi orynǵa túsip qaldy.
Endi V týr oıyndary 9 (senbi) jáne 10 sáýir (jeksenbi) kúnderi ótedi. Bul týrda «Ordabasy» – «Tobyl», «Atyraý» – «Aqjaıyq», «Qaırat» – «Kaspıı», «Turan» – «Qyzyljar», «Astana» – «Taraz», «Aqsý» – «Aqtóbe» jáne «Shahter» – «Maqtaaral» komandalary kezdesedi.
