Petropavldyń soty kámeletke tolmaǵan balasy úshin áıelden alıment óndirý týraly sheshim shyǵarady. Biraq sot sheshimi qolyna tıse de, týǵan balasyna jany ashymaǵan «kókek» áıel alıment tóleýdi oıyna da almaı, Reseıdiń Túmen qalasynda basqa bir erkekpen turyp jatady. Biraq qazaqstandyq sot sheshimin oryndatýshylar da onyń qyr-sońynan qalmaıdy. Alaıda áıel izin joǵaltyp, Túmen qalasynan (Reseı) kóship ketedi.
Naýryzdyń 28 men 30-y aralyǵynda Soltústik Qazaqstan oblysynyń polıseıleri boryshkerlerdi, alımentten jaltarýshylardy jáne týystyq baılanystaryn úzgenderdi izdestirý boıynsha aksııa ótkizgen bolatyn. Aksııa barysynda 40 jastaǵy «kókek» áıeldiń AQSh-qa qonys aýdarǵany belgili bolyp, Amerıkadaǵy meken-jaıy anyqtaldy. Endi sot oryndaýshysy AQSh-tyń quqyq qorǵaý organdary arqyly alımentti óndirip alatyn shyǵar degen úmit bar. Bul oqıǵa qazirgi zamanda tipti basqa memleketke qashýdyń ózi sottyń quryǵynan qutqarmaıtynyn kórsetti.
Atalǵan aksııa barysynda oblys polıseıleri barlyǵy 75 is boıynsha boryshkerlerdi izdestirgen. Onyń jartysy derlik balalardy qaraýsyz qaldyrǵan ata-analarmen baılanysty. «Jalpy, aksııanyń alǵashqy kúninde izdeýde júrgen 14 adam anyqtaldy. Onyń 4-ýi boryshker, 7-ýi alıment tólemeýshi jáne týystyq baılanystaryn joǵaltqan 3 adam. Olardyń beseýi oblys aýmaǵynan tys jerde anyqtaldy, ekeýi alys shetelde ekeni belgili boldy. Araqashyqtyq jumysty qıyndata túsedi, biraq baǵyndyrylmaıtyn kedergi joq. Izdeý jumysy udaıy negizde jalǵasatyn bolady. Jyl basynan kóshi-qon qyzmetiniń barlyq úsh baǵyty boıynsha 93 adam esepte turǵan, qazirgi ýaqytta 43 adamnyń júrgen jeri anyqtaldy», deıdi Polısııa departamenti Kóshi-qon qyzmeti basqarmasy basshysynyń mindetin atqarýshy, polısııa podpolkovnıgi Ermek Nusyrbaev.
Soltústik Qazaqstan oblysy
