Kóktem kórkimen keldi

Qazir oblystyń tótenshe jaǵdaı­lar­ǵa qatysty qyzmetteri alańdaýly ýaq. О́ıtkeni jýas kóktemniń ózi keı­de aıaq astynan minez tanytyp kete­di. Búginde Sergeev sý qoımasy 75,8 paıyzǵa tolǵan. Oblystyq TJD bastyǵynyń orynbasary Murat Qan­ǵo­jınovtyń aıtýyna qara­ǵanda, bul sý qoımasy áli 168 mln tekshe metr sý qabyldaı alady. Sý tasqynyn eńserýge oblysta 475 adamdy qamtyǵan 8 top qurylǵan. Olarda 134 birlik tehnıka bar. Bul toptar Músirepov, Aıyrtaý jáne Tımırıazev aýdandaryndaǵy shaǵyn ózender men kólderge monıtorıng jasaıdy. Oblysta shaǵyn ózenderdiń qaýpi Aıyrtaý, Músirepov, Tımırıazev jáne Shal aqyn aýdandarynda joǵary. Jazda qurǵap qalatyn keıbir ózenshikter kóktemde kárine minip, adam men malǵa zııanyn tıgizip baǵady. Osy ózenderdiń jaǵalaýynda 6 068 adamdy qamtyǵan 85 eldi meken ornalasqan.

Oblystyq mobılızasııalyq daıyn­dyq jáne azamattyq qorǵanys bóli­mi­niń bastyǵy Serik Gaısın tasqynǵa tosqyn jasaý úshin 34 taraýdan turatyn «Negizgi sharalar jos­pary» jasalǵanyn aıtty. Kóktemgi tasqyn keıbir jyldary avtomobıl joldaryn jyryp ketip jatatyn. Bıyl ondaı qaýip bola qoımas, biraq sonyń ózinde azamattyq qorǵanys bólimi respýblıkalyq jáne oblystyq jol­dar­dyń qaýipsizdigin saqtaý úshin úsh shara belgiledi. Sondaı-aq qor­ǵanys dambasyn bekitý, sý ótkize­tin qubyrlardy arshý, kópirlerdi be­ki­tý sııaqty sharalar da josparda qam­tylǵan.

Byltyrǵy qysta qar mol bolyp, tótenshe jaǵdaı qyzmetterin qatty ábigerge salǵan. Sý basyp qalý qaýpi bolǵan 27 eldi meken qutqarylǵan edi. Bıyl da, sondaı qorǵanys jumystary atqarylýda. Sonyń ishinde sý joldardy shaıyp ketpes úshin ótkizgish qubyrlar salyndy, buryn salynǵany tazalandy. Respýblıkalyq mańyzy bar joldardyń boıynda 19 kópir, 607 sý ótkizgish qubyr bar. Al ob­lystyq jáne aýdandyq mańyzy bar joldarda 32 kópir jáne 1 391 sý ótkizgish qubyr ornalasqan. So­lar­dyń báriniń tasqynǵa saqadaı saı bolýy qadaǵalanýda. Ákimdik TJ departamentimen birlese otyryp, tasqynnyń barysyn boljaýǵa «Ǵarysh sapary» geoportalyn qoldanýda. Ǵaryshtan túsirilgen fotolar qardyń qaı jerde qalyń ekenin, tasqyn qaýpi qaı jerde joǵary ekenin kórsetedi. Sýdyń gıdrogeologııalyq ahýalyn oblys boıynsha 19 beket baqylap otyrady. Onyń ishinde bir-birden Sergeev jáne Petropavl sý qoımasynda, «Úlken Torańǵul» kólinde, qalǵany Esil ózeni men onyń saǵalarynda ornalasqan. Keshegi kúnge deıin qarǵyn sýdyń áserinen Esil ózeniniń kóterilýi 3-28 sm aralyǵynda boldy. Al shaǵyn ózenderdegi sý deńgeıi keıbir jerlerde 55 sm deıin kóterilgen.

Gıdrometerologııalyq ortalyqtyń habarlaýyna qaraǵanda, sáýirdiń 6-8 aralyǵynda oblys aýmaǵyna sýyq aýa aǵynynyń kelýimen temperatýra túnde 6 gradýsqa deıin sýytady. Odan keıin kúnniń qyzýy artyp, shaǵyn ózenderdegi sý deńgeıi kúrt kóteriledi. Jalpy, sáýirdiń ekinshi onkúndiginde aýanyń temperatýrasy 20 gradýsqa deıin jylynady. Úshinshi onkúndikte de osy qalyp saqtalady. Sóıtip, kenetten bir qapylys bolmasa bıylǵy kóktem aqqaıyńdar aralynda qalyptaǵydaı bolmaq.

Soltústik Qazaqstan oblysy