Oqys oqıǵa 3 sáýir kúni Kúmistaý temirjol kópirinde oryn alǵan. Mamandardyń aıtýynsha, poıyz saǵatyna 37 shaqyrym jyldamdyqpen jyljyp bara jatqan eken. Vagondar Ertis ózenindegi kópirlerdiń birine taıaǵanda, shoıyn joldan shyǵyp ketken. Eń bastysy, adam aman, zardap shekkender joq. Ulttyq kompanııa ókilderiniń málimetteri boıynsha, jolaýshy jáne júk poıyzdarynyń kidirisi bolǵan joq. Qazirgi ýaqytta qalpyna keltirý jumystary júrip jatyr. Bolǵan jaǵdaıdyń sebep-saldaryn tekserip, anyqtaý úshin «QTJ» UK» AQ basshylarynan komıssııa quryldy. Transporttyq polısııa departamenti tarapynan da birqatar tekserý jumystary bastalǵan.
Al shyǵaryndy qoj ben rýda tógilgen Ertis ózenine qaýip tóngen joq pa? Osy suraqty arnaıy ótken baspasóz konferensııasynda oblystyq Ekologııa departamentiniń bastyǵy Danııar Álıevke qoıǵanbyz.
– О́skemennen Altaı stansasyna baǵyt alǵan poıyz Kúmistaý temirjol kópirine jete bere vagondary relsten shyǵyp ketken. Belgili bolǵandaı, bir vagon rýda men bes vagon qoj Ertiske tógilgen. Shyǵaryndy qojdy kenshiler ınertti materıal retinde shahtadaǵy úńgigen oryndardy jabý úshin nemese qurylys materıaly retinde paıdalanady. Bolǵan jaǵdaıdy estı sala ekologııa departamentiniń mamandary oqıǵa ornyna shyǵyp, sýdan synama aldy. Alynǵan synama sýdyń hımııalyq quramyn aýyr metaldarǵa tekserdi. Onyń ishinde mys, qorǵasyn, sınk bar, – dedi departament bastyǵy.
Aıta keterligi, synama nátıjesi bir kúnnen keıin daıyn boldy. Belgili bolǵany, vagondar qulaǵan tustaǵy sý synamasynda myryshtyń shekti ruqsat etilgen konsentrasııasy 1,3 ese artqan eken. Sál tómengi aǵystan alynǵan synamada shekti mólsherden 1,5 esege kóp. Sondaı-aq 1,3 esege mys konsentrasııasynyń joǵarylaýy baıqalady. Endi tekserý is-sharalary aıaqtalǵanǵa deıin ekologııa departamenti oblys boıynsha «Qazgıdromet» FMDQ-pen birlesip, apta saıyn Ertis ózeniniń atalǵan aýmaǵynda sýdyń quramyn tekserip otyrmaq. Sonymen qatar oblystyq transporttyq prokýratýrasynyń talaby boıynsha «QTJ Júk tasymaly» AQ «Semeı bólimshesine» qatysty jospardan tys ekologııalyq tekserý taǵaıyndaldy.
Qazgıdromet mamandary da máseleni nazarǵa alyp, óz mindetterine saı jumystar júrgizip jatyr. Aldaǵy ýaqytta sýǵa tógilgen qojdy shyǵarý jumystary da júrgiziledi. Biraq oqıǵa oryn alǵan jerge tehnıkanyń jetýi qıyn. Mamandardyń ózi eki shaqyrymǵa jýyq joldy jaıaý-jalpylap júrip ótipti.
Shyǵys Qazaqstan oblysy
