Týrnırdiń birinshi raketkalary bolyp tirkelgen Andreı Golýbev fransııalyq Fabrıs Martenmen birge bastapqy kezdesýinde nıderlandtyq Tallon Grıkspýr-Botık Van de Zandshýlppen sheberlik baıqasty. Tartysty ótken matchtyń birinshi partııasynda nıderlandtyq jup taı-breıkte sátti oınady – 7:6 (8:6). Ekinshisinde Golýbev pen Marten ese qaıtardy – 7:6 (7:2). Sosyn sýper taı-breıkte myqtylyq tanytyp, qarsylastarynan jeńisti julyp aldy – 10:6. Eki saǵatqa sozylǵan báseke barysynda qazaqstandyq-fransııalyq jup 2 eıs jasap, 3 breık-poınttyń bireýin paıdalandy. Qarsylastary 3 eıs, 1 breıkpen (2 breık-poınt) kózge tústi.
Pákistandyq Aısam Kýreshımen birge jup qurap óner kórsetip jatqan Aleksandr Nedovesov dodanyń 2-raketkalary belgııalyq Sander Jılle-Ioran Flıgendi bir saǵattan sál astam ýaqytta 6:3, 6:4 esebimen tize búktirdi. Nedovesov pen Kýreshı 4 eıspen birge 3 breık-poınttyń ekeýin óz esebine jazdy. Belgııalyq jup 4 eıspen shekteldi. Qazaqstandyqtardyń shırek fınaldaǵy qarsylastary keıin anyqtalady.
