Halyqaralyq týrnırdegi alǵashqy altyndy el qorjynyna 2021 jyly Serbııada uıymdastyrylǵan álem chempıonatynyń kúmis júldegeri Serik Temirjanov saldy. 57 kılo salmaqta óner kórsetken otandasymyz irikteý kezeńderinen bastap, fınalǵa deıingi qarsylastaryn esh kúmánsiz jeńdi. Jartylaı fınalda rıng qojaıyny Rýdjakran Djýntrongty upaı sany boıynsha qapy qaldyryp, fınalǵa joldama aldy. Týrnırdiń fınaldyq básekesinde jerlesimiz 2019 jylǵy Azııa chempıonatynyń qola júldegeri Fılıppın ókili Iаn Klark Baýtıstamen bas júldeni sarapqa saldy. Úsh raýndta da qarsylasyna qaraǵanda kóp soqqy jumsap, rıngte belsendi qımyldady. Nətıjesinde, barlyq tóreshi S.Temirjanovtyń myqtylyǵyn moıyndap, jerlesimiz altynnan alqa taqty.
Ekinshi altyn medaldy jastar arasyndaǵy álem chempıony Nurbek Oralbaı (81 kılo) jeńip aldy. Jerebege sáıkes jekpe-jekterin jartylaı fınalda bastaǵan otandasymyz alǵashqy aıqasynda taılandtyq Anavat Tongkatokty merziminen buryn jeńip, fınalǵa joldama aldy. Jerlesimizdiń aýyr soqqylaryna shydaı almaǵan taılandtyq boksshy ekinshi raýndtan keıin jekpe-jekti jalǵastyrýdan bas tartyp, jeńilgenin moıyndady. Fınaldyq aıqasta qazaqstandyq boksshyny Úndistannyń maqtanyshyna aınalǵan áıgili Ashısh Kýmar kútip turdy. 2019 jyly 75 kılo salmaqta Azııa birinshiliginiń kúmis júldegeri (fınalda qazaqstandyq Tursynbaı Qulahmetten jeńildi) atanǵan boksshy Taılandtaǵy týrnırdiń altynynan dámeli edi.
Alaıda aýyr salmaqtaǵy boksshylardyń aıqasynda jerlesimiz úndistandyq boksshyǵa esh múmkindik qaldyrǵan joq. Asa tartysty ótken kezdesýdiń birinshi raýndynda tóreshiler jeńisti aralas daýyspen Nurbekke bergen (4:1) bolsa, ekinshi jáne úshinshi raýndtarda otandasymyz bes tóreshiniń de daýysyna ıe boldy. Nurbek Oralbaı – týrnır chempıony!
Kóp keshikpeı Nurbektiń syńary Aıbek te sharshy alańǵa kóterilip, ol da Taılandtaǵy týrnırdiń jeńimpazy atandy. 91 kıloda ótken jartylaı fınaldyq jekpe-jekte Aıbek Oralbaı Qazaqstan ulttyq quramasynyń taǵy bir boksshysy Saǵyndyq Toǵambaımen judyryqtasty. Tóreshilerdiń basym daýysymen jeńiske jetken Aıbek fınalǵa joldama aldy. Alaıda fınaldaǵy qarsylasy belgisiz sebeppen rıngke kóterilgen joq. Sóıtip, Aıbek Oralbaı el qorjynyna úshinshi altyn medaldy saldy.
О́kinishke qaraı, fınalda óner kórsetken eki boksshymyzdyń joly bolmaı, kúmis júldeni qanaǵat tutty. Ulttyq qurama kapıtany Aslanbek Shymbergenov (69 kılo) jartylaı fınalda jergilikti boksshy Atıchaı Fomsapty ekinshi raýndta nokaýtpen jeńgenimen, fınalda taǵy bir taılandtyq Býndjong Sınsırıden jeńilip qaldy. Alǵashqy raýnd Shymbergenovtiń paıdasyna aıaqtalǵanymen, ekinshi raýndta Býndjong jerlesimizdi bir ret aýyr soqqysymen nokdaýnǵa túsirdi. Úshinshi raýndta da Sınsırı myqtylyq tanytty.
Al 63 kılodaǵy Sultan Mýsınov jartylaı fınalda taǵy bir jerlesimiz Sanatáli Tóltaevti jeńgenimen, fınalda Taıland ókili Somchaı Vongsývannan aılasyn asyra almady. Sóıtip, ol da kúmis medaldy qanaǵat tutty.
Jartylaı fınal básekesinde jekpe-jekterin aıaqtaǵan Sanatáli Tóltaev (63,5 kılo), Saǵyndyq Toǵambaı (91 kılo) jáne Aıatolla Tákijanov (75 kılo) Thailand Open halyqaralyq týrnıriniń qola júldegerleri atandy.
Jalpykomandalyq esepte Taıland quramasy kúmis júldesiniń (4) kóptigine baılanysty top jardy. 3 altyn, 3 kúmis júldesi bar Úndistan ekinshi orynǵa taban tirese, Qazaqstan úzdik úshtikti túıindedi.
