Qaladaǵy qazanshuńqyr Rıdder turǵyndaryn úreılendirdi

Rıdder qalasynda «Qazsınk» kompanııa­­­symen enshiles «Altyn Tau-Vostok» JShS-ine qarasty jerasty kenishteri biriniń beti opyrylyp túsip ketti. Shahar ortalyǵynan úsh shaqyrym jerde oryn alǵan bul oqıǵa ornynda tereńdigi – 30, dıametri 70 metrdi quraıtyn úlken qazanshuńqyr paıda boldy. Býrabaı kóshesindegi №5 jeke úı atalǵan qazanshuńqyrǵa túsip ketken. Turǵyndar úıden der ýaqytynda shyǵyp úlgerdi. Anastasııa Tatarnıkova sábıimen úıde otyryp, tabanynyń asty dirildegenin sezgen soń dalaǵa shyqqan eken. Qoryqqan jas ana syrtqa shyqqanda úıiniń bir sheti qazanshuńqyrǵa ilinip turǵanyn baıqaǵan. Sálden soń úı opyrylyp, jer qyrtysymen birge apanǵa aýnap túsken. Bul aralyqta Anastasııa úıdegi qyzy men qajetti qujattaryn alyp úlgeripti. Rıdder-Sokolnyı kenishinde oryn alǵan tótenshe jaǵdaıǵa baılanysty jumys toq­tatylyp, 480 kenshi jer betine shyǵa­ryldy. Abyroı bolǵanda, oqıǵa ornynda qaıtys bolǵandar men zardap shekkender joq. Degenmen, 500 metr radıýsta ornalasqan úılerdiń barlyǵy qorshaýǵa alynyp, 173 turǵyn kóshirildi. Onyń ishinde 60 adam «Qazsınk» JShS emhanasyna jatqyzylyp, qalǵany «Sınegore» demalys bazasyna or­nalastyryldy. Olarǵa ystyq tamaq, psıho­logııalyq kómek berý jáne medısınalyq kezekshilik uıymdastyrý jumystarymen atalǵan kásiporyn shuǵyldanyp jatyr. Oblystyq tótenshe jaǵdaılar jónindegi departament ókilderiniń málimeti boıynsha, qazanshuńqyr erneýiniń dıametri taǵy 5 metrge deıin keńeıgen. Oqıǵa ornynda taýda qutqarýshylar áskerı jasaǵy, qalalyq ishki ister basqarmasy, qalalyq sý arnasy, jylý-elektr ortalyǵy jáne taǵy basqa qyzmet ókilderi jumys isteýde. Atalǵan shahtanyń ıesi sanalatyn «Qazsınk» kásipornynyń basshylyǵy turǵyndardyń barlyq shyǵyn­daryn kóterip alýǵa, olarǵa ótemaqy tóleýge ýáde berip otyr. Oblystyq tótenshe jaǵdaılar departa­mentiniń baspasóz qyzmeti úıdiń qıraýy men alyp qazanshuńqyrdyń paıda bolýyna ken kameralarynyń birindegi shatyrdyń qulaýy sebep bolǵanyn jetkizdi. Oqıǵa ornynda oblystyq prokýratýra qyzmetkerleri tekserý jumystaryn júrgizýde. Rıdder qalasynyń prokýratýrasy turǵyn úıdi jutyp qoıǵan apandaı qazanshuńqyrdyń paıda bolýyna baılanysty Qazaqstan Respýblıkasy Qylmystyq kodeksi 245-babynyń ekinshi tarmaǵy boıynsha qylmystyq is qozǵady. Sondaı-aq, tehno­gendik apatqa baılanysty qalada tótenshe jaǵdaı jarııalandy. О́nerkásiptik qalaǵa jatatyn Rıdderdegi jaǵdaıdy oblys basshylary baqylaýǵa alyp, jergilikti halyqqa qajetti kómekpen qamtamasyz etý jumystaryn jalǵas­tyrýda. Oqıǵa ornynda óńirlik jedel shtab qurylyp, oblys ákiminiń orynbasary Nurymbet Saqtaǵanov tabıǵı apattyń saldaryn joıý jáne ári qaraıǵy is-áreket josparyn anyqtaý maqsatynda jedel jıyn ótkizdi. Qalyptasqan jaǵdaıǵa baılanysty Rıd­derdegi kópqabatty úılerdiń turǵyndaryn da mazasyzdyq bılegen. Alaıda, «Qazsınk» JShS ókilderiniń aıtýynsha, kópqabatty sektorda jerasty úńgý jumystary júrgizilmegen. Ká­siporynnyń bas kenshisi Valerıı Zavıalov jer astyndaǵy úńgý jumystary negizinen qalanyń eski aýdanyna jatatyn jeke turǵyn úı sektory, Botanıka, «Qazsınk» profılakto­rııasy, eski bazar aýmaǵynda júrgizilgenin aıtady. Dýman ANASh, «Egemen Qazaqstan». RIDDER.