Shymkent qalalyq densaýlyq saqtaý basqarmasynyń baspasóz qyzmeti 10 sáýirde jedel járdem qyzmetine er adamnyń bıikten qulap, jaraqat alǵany týraly habarlama túskenin rastady.
Dárigerlerdiń aıtýynsha, er adam komada, jaǵdaıy aýyr.
«Oqıǵa ornyna kelgen medısına qyzmetkerleri naýqasqa alǵashqy medısınalyq kómek kórsetip, ony №1 qalalyq klınıkalyq aýrýhanaǵa jetkizdi. Tekserý kezinde naýqastyń basynyń mańdaı aımaǵynyń jyrtylǵany anyqtaldy. Hırýrgııalyq em júrgizildi. Naýqastyń jaǵdaıy aýyr, ol jansaqtaý bóliminde jatyr», dep habarlady vedomstvodan.
Shymkent qalalyq IIB sotqa deıingi tergeý jumystary bastalǵanyn habarlady.
«2022 jyldyń 10 sáýirinde Báıdibek bı kóshesindegi attraksıondar saıabaǵynda oryn alǵan jaıt boıynsha Ál-Farabı aýdany Polısııa basqarmasynyń qyzmetkerlerimen QR QK 306-babynyń 1-bóligimen (tutynýshylar ómiriniń nemese densaýlyǵynyń qaýipsizdigi talaptaryna saı kelmeıtin jumystardy oryndaý ne qyzmetter kórsetý) qylmystyq is tirkeldi. Qazirgi tańda sotqa deıingi tergep-tekserý jumystary júrgizilip jatyr, onyń barysynda jaıttyń barlyq mán-jaıy anyqtalatyn bolady», delingen habarlamada.
