Saýalnama nátıjelerine qaraǵanda, respondentterdiń 70%-y Memleket basshysy Qasym-Jomart Toqaevtyń qyzmetine oń baǵa berdi.
Suralǵandardyń 67,4%-y Prezıdentke degen qarym-qatynasy jaqsarǵanyn moıyndaǵan.
Kópshiliktiń (42,1%) pikirinshe, Prezıdent, eń aldymen, azamattardyń quqyqtary men bostandyqtaryn qamtamasyz etýge nazar aýdarýy kerek. Bul rette otandastarymyzdyń 41,4%-yn jalaqy, zeınetaqy jáne járdemaqy deńgeıin kóterý máselesi tolǵandyrsa, 35,3%-y azamattardyń qaýipsizdigin qamtamasyz etýdi qoldap otyr. Suralǵandardyń 35,5%-y halyqaralyq baılanystardy nyǵaıtý qajet dep sanaıdy.
Saýalnamaǵa qatysqandardyń tórtten bir bóligi (26,3%) Qasym-Jomart Toqaev sybaılas jemqorlyqqa qarsy kúreske erekshe kóńil bólgenin qalaıdy. Saýalnamaǵa qatysýshylardyń jartysynan astamy (56,7%) Prezıdent qyzmetiniń negizinde qaýipsizdik, áleýmettik ádilettilik (35,9%), turaqty ekonomıkalyq damý, árbir otbasynyń amandyǵy, qoǵamdaǵy dostyq pen kelisim (26-28%) máseleleri bolýy tıis dep esepteıdi.
Sondaı-aq saýalnama nátıjeleri halyqtyń 20,5%-y Úkimetke, al 15%-y jergilikti atqarýshy organdarǵa úmit artatynyn kórsetti. Parlamentke (Senat, Májilis) degen senimi – 14,1%-dy qurady.
Saýalnamaǵa qatysýshylardyń 34,3%-y úshin eń mańyzdy qundylyq - táýelsizdik.
Aıta ketsek, áleýmettik zertteý 15-24 naýryz aralyǵynda júrgizildi. Saýalnamaǵa 1863 respondent qatysty, olar: 18-50 jas aralyǵyndaǵy turǵyndar, ınternet paıdalanýshylary. Saýalnama Nur-Sultan, Almaty, Shymkent qalalary men eldiń 14 oblysynda júrgizildi.
