Senat Tóraǵasy Máýlen Áshimbaev jýyrda jaıylym máselesin sheshýge baǵyttalǵan zań jobasyn tanystyrdy. Osy arada endigi negizgi máseleniń marǵasqasy, osy daıyndalǵan zań jobasyna jeke qosalqy sharýashylyqtardyń malyn shuraıly, qunarly jaıylymdarmen qamtamasyz etýge baǵyttalǵan naqty sharalar belgilenýge tıis. Atap aıtar bolsaq, birinshiden, aýyl ákimshiliginiń bekitiletin bıýdjetterin josparlaǵanda, sol jospardyń ishine mindetti túrde aýyl ákimine tikeleı baǵynatyn kommýnaldyq sharýashylyq uıymdastyrylyp, qurylýy qajet. Osy kommýnaldyq sharýashylyqty kerekti tehnıkamen, arnaıy qurylǵysy bar traktorlarmen, avtomashınalarmen, qamtamasyz etip, ony bilikti jaqsy mamandarmen tolyqtyrý kerek. Bul ujymnyń músheleri aýyl turǵyndaryna ózderi shóp shaýyp, egin, mal sharýashylyǵymen tolyq aınalysa alatyn, al qys mezgilinde jol, kóshelerdi óz kúshimen tazarta alatyn dárejede bolyp, kerek kezinde usaq jeke menshik ıelerine, ásirese zeınetker, aýrýshań, turmysy tómen otbasylarǵa qysy-jazy kerekti aǵashyn, kómirin qoljetimdi baǵamen satyp jáne tasyp bere alsa, mine, sonda ǵana el mereıi kóterilip, áleýmettik jaǵdaıdyń durystalýyna úlken septigi tıetini aıdan anyq.
Osy kezek kúttirmeıtin máseleler atalǵan zańda durys sheshimin tappasa, onda «baıaǵy jartas, sol jartas» bolyp qala bermek, el turǵyndary daraqylyq, dáıeksiz, daýryqpa sózderden aıyryla almaı, búk túsip búgilgen kúıinde qala beredi.
Munyń negizgi sebep-saldaryna keletin bolsaq, jyl saıyn talasatyn tender jarysy. Osyndaı elge de, jerge de tipten tıimsiz paıdasy joq qısynsyz isti aýyldyq jerde múldem jabý kerek. Nege deseńiz, sol tenderge bólingen aqsha qory kesile-kesile sholaq kúrekteı bolyp, qarymdy, nátıjeli jumys isteýge jumsalmaı, aıaǵy irigen-shirigen dúnıelerge baryp tirelip jatady.
Sondyqtan osy aıtylǵan túıtkildi taqyrypty maıshammen qarap, batyl da, durys sheshimder qabyldansa nur ústine nur bolar edi. Zań súzgilikti synaqtan ótse ǵana el ómirine senimdi serpin beretini sózsiz.
Jańbyrshy TILEÝǴABYLOV,
zeınetker
Qostanaı oblysy,
Rýdnyı qalasy
