Depýtattar halyqqa memleket tarapynan kómek kórsetiletinin aıtyp, máselelerdi ózderiniń jiti baqylaýynda ustaıtynyn jetkizdi. О́zderińizge belgili, Memleket basshysy Qasym-Jomart Toqaev qazaqstandyqtardyń ál-aýqatyn jaqsartý máselelerine erekshe nazar aýdaryp, depýtattardy halyqqa jaqyn bolýǵa, adamdardyń qajettilikterine jedel den qoıýǵa, olardy tolǵandyrǵan máselelerdi sheshýge shaqyrǵan bolatyn.
Májilis depýtattary, Amanat partııasy fraksııasynyń músheleri Málik Qulshar pen Snejanna Imasheva Batys Qazaqstan oblysyna baryp, sý tasqynynan zardap shekken aýdan turǵyndarymen kezdesti. Málik Qulshar Qaratóbe aýdanyndaǵy Shalǵyn aýylynda balalardyń oqýy uıymdastyrylǵan aýyldyq klýbta muǵalimdermen tildesip, mán-jaıdy talqylady.
«Mekteptiń ǵımaratyna sý kirip, bólmelerdiń ortasy qulaǵan. Qazir oqýshylar ýaqytsha Aýyldyq klýbta bilim alýda. Aýyldaǵy 45 úıdiń 29-yna sý kirgen, 23-i turýǵa kelmeıdi. Aýyl turǵyndary sý kirmegen úılerge 3-4 otbasydan bólinip ornalasqan. Qulaǵaly turǵan úılerdi saraptaý jónindegi komıssııa jumys isteýde. Aýyl halqy eshqaıda kóshpeı, jańa mektep te, úıler de osy aýylǵa salynsa degen ótinishterin jetkizdi», dedi depýtat.
Sondaı-aq aýdanda tótenshe jaǵdaı jarııalanǵandyqtan eshqandaı konkýrssyz qarjy qarastyrý múmkindigi bar ekenin aıtyp, qurylǵan komıssııanyń sheshimimen apatty jaǵdaıdaǵy mektep ornyna 60 oryndyq bilim ordasynyń qurylysy bastalatynyn jetkizdi.
Sapar barysynda depýtattar jergilikti bılik ókilderimen birge oblystaǵy Bórli aýdanynyń Qyzyltal aýylyndaǵy sý tasqynynan zardap shekken úılerdi aralady. Aldaǵy ýaqytta sý tasqynynan qorǵaný úshin arnaıy nysan salý josparlanyp otyr.
Al Pavlodar oblysynda Májilis depýtattary Aıgúl Nurkına men Vera Kım Rojdestvenko aýylynda sý tasqynynan zardap shekken otbasylarmen kezdesip, olarǵa partııa atynan turmystyq tehnıka, azyq-túlik, basqa da kerek-jaraqtarmen kómektesti.
«Biz árdaıym monıtorıng jasap otyrmyz. Búgin jaǵdaıdy óz kózimizben kórýge keldik. Endigi basty másele – tıisti kómek kórsetý. Apat saldaryn anyqtap, tıisti sharalardy qolǵa alý», dedi Aıgúl Nurkına.
Mamandardyń aıtýynsha, sý tasqynynyń oryn alýyna arnaıy bógetterdiń joqtyǵy sebep bolyp otyr. Depýtattar sý tasqyny máselesi jiti baqylaýda bolatynyn aıtyp, qajet bolǵan jaǵdaıda zańnamaǵa ózgeris engiziletinin de jetkizdi.
Jalpy, Rojdestvenko aýylynda 30-ǵa jýyq úı erigen qar sýynan zardap shekti. Saldarynan aýdanda tótenshe jaǵdaı jarııalanyp, 100-ge tarta turǵyn qaýipsiz jerge kóshirilidi.
Májilis depýtattary Amanǵalı Berdalın men Ǵalymjan Eleýov Aqtóbe oblysynyń Qobda jáne Oıyl aýdandaryndaǵy sý basý qaýpi bar eldi mekenderdi aralap, tabıǵı apattyń aldyn alý sharalarymen tanysty.
Qobda aýdanynda sý tasqynynan birneshe áleýmettik nysan, sport kesheni men shaǵyn jáne orta bıznes ǵımarattary zardap shekken. Jaryq aýylynda sýarmaly jerlerdi sý bassa, Egindibulaqta sý tasqynynan keıingi jol qalpyna keltirilýde.
Depýtattar Oıyl aýdanyna da bardy. Munda Saraljyn aýyldyq okrýginde bolyp, Orta-Qıyl-Tassaı sý júıesin baqylady. Qazirgi tańda okrýg boıynsha 5 600 gektar lımandy alqapqa sý shyǵyp otyr. Byltyr jóndeýden ótken sý júıeleri qazir tasqyn sýdy ustaýǵa septigin tıgizýde.
Májilis depýtattary – Amanat partııasy fraksııasynyń músheleri Erlan Saıyrov, Edil Jańbyrshın jáne Zarına Kamacova Shyǵys Qazaqstan oblysyna arnaıy jumys saparymen bardy.
Depýtattar Glýbokoe aýdany Beloýsovka aýylynda ornalasqan sý qoımasyna baryp, ondaǵy jaǵdaıdy óz kózderimen kórdi. Sonymen qatar atalǵan aýdandaǵy Progress, Predgornoe aýyldaryndaǵy sý tasqyny qaýpi bar ýchaskelerdi aralady.
«Búgingi tańda turǵyndar tarapynan tasqyn sý máselesine baılanysty saýal kóp túsýde. О́ńirlerde sý qoımalarynda túıtkildi másele de joq emes. Buǵan deıingi shyǵysqa jumys saparymda Zaısan aýdanyndaǵy Údeneı, Tarbaǵataı aýdanyndaǵy Qandysý sý qoımalaryndaǵy ózekti máselelerdi kótergen edim. Biz máseleniń saldarymen emes, sebebimen kúresýimiz qajet», dedi Májilis depýtaty E.Saıyrov.
Mamandardyń aıtýynsha Glýbokoe aýdanynyń Beloýsovka aýylyndaǵy sý qoımasy 1946 jyly paıdalanýǵa berilgen. Glýbochanka ózeni jáne kishi Ertis ózeniniń oń jaǵalaýy quıady. Sý qoımasynyń uzyndyǵy 3,3 km bolsa, maksımaldy tereńdigi – 8.5 metr. Sý qoımasyna jyl saıyn aǵymdaǵy jóndeý jumystary júrgizilip turady.
«Turǵyndar tarapynan kóterilgen másele nazardan tys qalmaıdy. Memleket basshysy depýtattardy halyqpen jıi júzdesip, tolǵandyrǵan máseleleriniń oń sheshim tabýyna atsalysýdy únemi aıtyp keledi. Búgingi jumys saparymyz da osy tapsyrma aıasynda júzege asyrylyp otyr», dedi Májilis depýtaty E.Jańbyrshın.
Depýtattar odan ári Shyǵys Qazaqstan oblysynyń Rıdder, Altaı, Katonqaraǵaı, Kúrshim, Zaısan, Tarbaǵataı aýdandaryn aralap, ondaǵy sý qoımalarynyń jumysymen tanysyp, aýyl turǵyndarymen kezdesti.
