Atymtaı men Quralaı búginde Ahmet, Álıhan esimdi eki ul, segiz qyz tárbıelep otyr. Kópbalaly otbasynyń turmys jaǵdaıymen tanysqan qala ákimi batyr anaǵa besik arba syılap, balalarǵa bazarlyq-táttilerden úlestirdi.
– Ospanovtar otbasynyń aýdany 58 sharshy metrdeı páteri bar. Árıne, bul on balaǵa tarlyq etedi. Alaıda tar úıdi memlekettik turǵyn úı qory esebinen keńeıtýge zań mursat bermeıdi. Biraq zańǵa qaıshy keledi dep qol qýsyryp otyra berýge taǵy da bolmaıdy. Sondyqtan máseleni sheshý úshin demeýshilerdiń kómegine júginýge týra keldi, – dedi Marat Júndibaev.
«Bolashaq konstrakshn» qurylys kompanııasynyń quryltaıshysy Ýálıhan Nysanov Ospanovtar otbasynyń páterin jańa salynyp jatqan elıtalyq turǵyn úı keshenindegi keń páterge aıyrbastap beremin dep otyr.
– Negizi bul otbasynyń jaǵdaıy jaman emes, ashyq, eńbekqor, jaqsy kisiler eken. Olar týraly áleýmettik jeliden oqyǵanmyn. Sodan jaqynda jumys barysymen qala ákimine kirgenimde ol kisi osyndaı kópbalaly otbasy bar, eger qol ushyn berip, qoldaý kórsetemin degen nıetińiz bolsa, habarlasarsyz dedi. Keńsege kelgen soń mamandarmen keńesip kórsem, kómektesýge múmkindik bar eken. Birden oń sheshim qabyldap, ákim ekeýmiz baryp, qýantyp qaıttyq. Meni qýantqany, biz salyp jatqan úı sol mańaıda, balalardyń qazir oqyp jatqan mektebine jaqyn. Biz barǵanda úıge adam tolyp ketti, úı ıeleri dastarqan jaıyp, tórge shaqyrǵan soń, astan attap ketýge yńǵaısyzdanyp, ústel basyna otyryp edik, qýanysh ústinde baıqamaı ystyq shaı iship qoıyp, orazamdy buzyp aldym. Endi Alla keshirsin, buıyrsa keıin ótep alarmyn, – dep kúldi Ýálıhan Nysanov.
Qasıetti Ramazan aıynda jasalǵan izgi amal, sharapatty istiń saýaby myń ese mol. Shańyraǵy keńeıip, kóńili ósken kópbalaly áke Atymtaı da atymtaı demeýshilerge aǵynan jarylyp alǵys aıtty.
– Memleketten alaqan jaıyp suramasaq ta, ózderi bilip qoldaý kórsetip jatqan oblys, qala basshylaryna, qurylys kompanııasynyń basshysy Ýálıhan Nysanovqa, tilekshi bolǵan kópshilikke otbasymnyń atynan rahmetimdi aıtamyn! Qasıetti Ramazan aıynda jasaǵan jaqsylyqtary Alladan qaıtsyn dep tileımin, – dedi Atymtaı Ospanov.
Jańa salynyp jatqan turǵyn úı kesheni bıyl tamyz aıynda paıdalanýǵa beriledi.
QOSTANAI
