Aýyz ashatyn ýaqyt ta bolyp qaldy. Biraq aýyz ashyp jatqan eshkimdi kóre almadyq. Taraýyq ta oqylmady. Sálden soń aldymyzǵa as kelgen. Erterekte aýyz bekitken adamdarǵa aldymen shaı beriletin. Jalań shaı emes, dámi til úıiretin maıly búırek, ystyq qýyrdaq, palaý, taǵy basqa adal dám tartylatyn. Mańyzdysy shaı. Kúnimen sýsyn ishpegen adamnyń birden et jeýi múmkin emes qoı. Sońǵy ýaqytta dindar qaýym artyq ysyraptyń qajeti joq dep, birden as tartylyp júr. Qol jýylyp, jurt jaıǵasqan soń tóre tabaq ortamyzǵa keldi. Jeńdi bilekteı qazy, qyrtysy qalyń jambas, jalǵyz ózi jarym tabaqty alyp jatqan úlken omyrtqa, ishindegi maıyna saýsaq batpaıtyn jýan qarta. Bir tabaq bylaı tursyn, jarym aýyldy tamaqtandyrýǵa bolatyn mol taǵam. Kezdigin jalańdatqan epsekti jigitter japyraqtap et týraýǵa kiristi. As ústindegi áńgimeniń negizgi arnasy – aýyzashar.
Keıin bildik, aýyzasharǵa jınalǵan osynsha adamnyń ishinde aýyz bekitken bireýi joq. Báriniń sebepteri daıyn, negizinen densaýlyq, endi bireýleriniń kúndelikti jumysynan qoly tımeıdi. Aýyzashardyń saýaby týraly biletin edik. Bul jerde kóptiń kóńiline qarap, tilimizdi tistedik. Astan soń ádettegideı shaı ishtik. Beımaral qalyp. Taǵy da saýap týraly sóz sabaqtaldy.
Shańyraq ıesine qaıyr-hosh aıtysyp bosaǵadan attap jatyrmyz. Shyǵa beriste maıly etti kóbirek qarbytyp, qarny sheńbirek atqansha jep toıattaǵan aǵaıyn: «baıqadyń ba, aýyz bekitken bireýi de joq eken, jaı ǵana keshki as ishkendeı boldyq qoı» dep kústánalady. Bar jaǵdaıdy kóz kórgenimen, aıtýǵa til tartynǵan.
Kelesi kúni tanys ımamǵa qońyraý shaldyq. Negizi aýyz bekitken adamdy shaqyrǵan jón dedi ol. Sóz tórkinin tanıtyn adamsyń ǵoı, «aýyzashar» dep aıtylyp turǵan joq pa?
Kezek bizge de jetken, tizim jasap otyrmyn. Jasy jetpisten asqan, biraq namazǵa jyǵylmaǵan, aýyz bekitpeıtin aǵam bar edi, úlkendi syılaıtyn ǵuryppen jazsam ba eken, álde aýyz bekitpegen ózinen kórsin desem be? Eki oıly bolyp otyrǵanym.
Kókshetaý
