«Qalqaman» shaǵyn aýdanyndaǵy №7 aýrýhananyń qabyldaý bólimshesine 1922 jyly týǵan naýqas jedel járdemmen kelgen. Oryn ájeı úıinde qulap, jaraqat alyp, jaq jambas býyny aýyrǵannan keıin aýrýhanaǵa jetkizilgen. Dárigerler dereý dıagnostıkalyq zertteýlerdi júrgizip, sol jaqtaǵy san súıeginiń moıyn bóligi ishten synyp, ornynan jyljyǵanyn anyqtaıdy. Osydan keıin pasıenttiń aıaq-qoldardy búgýge, bosatýǵa kelmeı, synǵan jaq bóligi qatty aýyrtyp turǵandyqtan, shuǵyl hırýrgııalyq ota jasaýǵa sheshim qabyldanady. Ádette, egde jastaǵy adamdardyń femoraldy moıyn súıegi synǵan kezde konservatıvti em kómektespeıdi.
Dárigerler naýqastyń jasy ulǵaıǵanyn, basqa da aýrýlarynyń bar ekendigin eskere otyryp, kardıolog, ınternıst, anestezıologtermen birge keńesedi. Operasııalyq brıgadadaǵy travmatologter R.Áskerov, B.О́teshev, anestezıolog-reanımatolog M.Datbaev pen medbıke J.Tólenova osy otany sátti ótkerýge bir kisideı atsalysyp, sol jaq jambas býynyna Strayker protezimen totaldy sementsiz artroplastıkasy jasalyndy. Medısına mamandary operasııa joǵary deńgeıde ótkenin, osylaısha №7 aýrýhananyń dárigerleri ǵasyr jasaǵan pasıentti aıaǵyna turǵyzǵanyn aıtady.
Travmatolog-dáriger Baýyrjan О́teshev sátti atqarylǵan ota naýqasty birden shıratyp, ekinshi kúni Oryn ájeı jansaqtaý bóliminen polıtravma bólimshesine aýystyrylǵanyn jetkizdi.
Eń qyzyǵy, dárigerler 100 jastaǵy naýqastyń súıek tinderi jasyna sáıkes kelmeıtinin, mıneraldy tyǵyzdyǵy joǵary, bul 50 ári ketse 60 jastaǵy adamdarǵa tán ekendigin aıtady.
Oryn ájeıdiń qyzy osynyń barlyǵy aldymen tańerteńgi gımnastıka men gıgıenalyq tazalyqpen bastalatyn anasynyń kúndelikti ómir saltynyń arqasynda ekendigin jetkizdi. Bir jaǵynan durys tamaqtana bilý de oń áser etedi. Ol kisi tek qoldan úıde pisirilgen azyq-túlikti az-azdan, belgili bir ýaqytta ǵana jeıdi. Qýyrylǵan taǵamdarǵa jolamaıdy, aıran-sútti kóbirek ishedi. Aıtqandaı, ol 10 balany dúnıege ákelip, biraz nemere, shóbereniń qyzyǵyn kórip, 6 shópshek súıgen baqytty áje.
Qazirgi ýaqytta naýqastyń jaǵdaıy birqalypty, ózin jaqsy sezinedi. «Tósekke tańylyp qalmaǵanym úshin birinshi Allaǵa shúkir! Odan keıin dárigerlerge myń alǵys! Anestezııany jeńil kóterdim. Shamasy, zamanaýı preparattar jaqsy ári dárigerlerdiń maǵan degen qamqorlyǵy óte úlken boldy. Olarǵa óte rızamyn. Qazir jaǵdaıym jaqsy», deıdi ǵasyr jasaǵan Oryn Baıjomartova.
ALMATY
