Bul jekpe-jektiń Japonııada ótýiniń tıimdi jaǵy sol, ýaqyty jaǵynan qazaqstandyqtar úshin óte qolaılylyǵymen erekshelendi. Osynyń nátıjesinde sharshy alańnyń shańyn shyǵarǵan jekpe-jekti eńbektegen baladan eńkeıgen kárige deıin tamashalaýǵa múmkindik aldy. Tipti ózderin sportqa jaqyn sanamaıtyn jurtshylyq ta sol kúni teledıdarǵa telmirdi. Jekpe-jek aıaqtalǵan soń jerlesimiz ózin jeńisimen quttyqtap, qoldaý bildirgen barshaǵa rıza ekenin aıtty. «Ásirese, qazaqstandyq jankúıerlerge rızashylyǵymdy bildiremin.Men árqashan sizderdiń qoldaýlaryńyzdy sezinip júremin. Rahmet, sizderge! Alǵa Qazaqstan!», dedi qaraǵandylyq chempıon.
Kóptegen jankúıerge G.Golovkınniń ózin keńqoltyq qazaqy qalypta kórsetkeni de qatty unady. Qarsylasyna óziniń ajyramas sımvolıkasyna aınalǵan oıýly shapanyn japqany óz aldyna, jeńip alǵan belbeýin qaıtaryp bergenin halqymyzǵa tán márttiktiń jarqyn kórinisine baladyq.
Egemen elimizdiń Kók týyn jelbiretip, Ánuranyn asqaqtatyp júrgen Gena baýyrymyzǵa árqashan abyroı bıiginen kórine ber degen tilek qosqym keledi.
Qymbat BEKMAǴAMBETOVA,
zeınetker
Aqmola oblysy,
Stepnıak qalasy
