Petropavldaǵy Zarechnyı kentiniń turǵyny Esil ózeniniń qarama-qarsy jarynda sulap jatqan adamdy kórip, polısııaǵa habarlaıdy. Adamnyń kim ekenin anyqtaý jáne oǵan alǵashqy kómek kórsetý sol mańda patrýlde júrgen Petropavl qalasy polısııa basqarmasynyń ınspektorlary Erik Jetibaev pen Tólegen Aldabergenovke júkteledi.
Topyraq qatpaǵan mundaı kezde jardyń shetin basýǵa bolmaıdy. Alaıda ekstremaldy oqıǵalardy qyzyq kóretin jastar jardyń shetine qasaqana barady. «Jeńis» saıabaǵy ornalasqan Esildiń jaǵasy da osyndaı ýaqytta qaýipti. Bul jaǵalaý birshama bıik jáne jarlaýytty, qulaǵan adam ústinen kórinbeıtin kómeski tustary kóp. Sondyqtan oqıǵa ornyna kelgen polıseılerge bergi jaǵada turǵan dabyl kóterýshi jigit qaltafonmen adam jatqan jerge qalaı ótýdi aıtyp turǵan. Áıtpese qulaǵan adam joǵarydan qutqarýshylarǵa kórinbeıdi.
«Birneshe mınýt ishinde bıiktigi 30 metr bolatyn jardan satylap ózen jaǵasyna tústik. Jaǵada jatqan qyz bala eken. Ol jardyń shetine deıin kelýge qyzyǵyp, topyraq opyrylyp ketkende jaǵaǵa qulap túsken kórinedi. Jatqanyna biraz ýaqyt bolǵany qyzdyń dirildep, qatty tońǵanynan kórinip turdy. Biz oǵan ústimizdegi syrt kıimderimizdi jaýyp, jylyttyq. Alaıda jaǵadaǵy balshyq aıaq attatpady. Jaǵdaı týraly rasııamen Jedel basqarý ortalyǵyna baıandap, qutqarýshylar men jedel járdem shaqyrýdy suradyq», deıdi Tólegen Aldabergenov.
Jedel kelgen qutqarýshylar qyzdy arnaıy platformaǵa salyp, barlyǵyn birge jar ústindegi qaýipsiz jerge alyp shyqqan. Bul kezde medısına qyzmetkerleri de kelip, qajetti kómek kórsetedi.
Abyroı bolǵanda 18 jastaǵy boıjetken qyz aman-esen óziniń jaqyndaryna oraldy. Eger Esildiń arǵy jaǵasyndaǵy Zarechnyı kenti turǵynynyń qyraǵylyǵy bolmasa onyń tiri qalýy neǵaıbyl edi. О́ıtkeni esin bilmeı túni boıy jatsa, túngi yzǵar qaterli bolatyn. Ony dál sol kezde izdegen de eshkim bolmaǵan eken.
PETROPAVL
