Pandemııanyń kesirinen ulan-asyr toı jasap, arqa-jarqa bolmaǵaly eki jyldyń júzi bolypty. Merekelik is-sharany saǵynysqan jurt aýdan ortalyǵy – Qasym Qaısenov kentine aǵyldy. Ulan aýdanynyń 14 aýyldyq okrýg ókilderi kıiz úılerin quryp, aq dastarhan jaıdy. Burq-sarq samaýyr qaınap, naýryzkóje sapyryldy.
Bozanbaı aýyldyq okrýgi qurǵan kıiz úıdi qarańyz, tabıǵı, esh jasandylyq joq. Kireberisinde sańqyldap, búrkit otyrsa, aýlasynda esikpen tórdeı bolyp, qumaı tazy jatyr. Tórinde túlki men kirpiniń terisi ilýli tur. Áýelete án shyrqap, kúmbirlete kúı tógemin deseńiz, úkili dombyrańyz ánekı. Zergerdiń qolynan shyqqan sandyq ústine qyzdyń júgindeı quraq kórpe jınalǵan. Dastarhanda ulttyq taǵamdar asta-tók. Úı ıesi Shákerman Oshan kelimdi-ketimdi qonaqtarǵa naýryz kóje usynyp, qonaqjaılyq tanytýda.
– Osy kıiz úımen etno týrızmdi qolǵa alyp otyrmyz. Kún jylynǵan soń aýlamyzǵa tigip qoıamyz. Qonaqtar kelip, qazaqtyń umyt bolyp bara jatqan dástúrlerin kóre alady. Qyzyǵýshylyq tanytsa, kıiz basyp, syrmaq syryp kórsetemiz. Keıin dúnıe-múlikti túıege teńdep, qazaqtyń kóshin kórsetkimiz keledi, – deıdi Bozanbaı aýylynan kelgen Shákerman Oshan.
Sondaı-aq bul kúni ulttyq sport túrlerinen jarystar uıymdastyryldy. Qyz-jigitter altybaqan teýip, máz-meıram bolyp jatsa, bozkilemde balýandar beldesip, kúsh synasty. Ádettegideı qoı kóterip saıysqanymen, júlde erekshe boldy. Birinshi oryn alǵan Sultan Amantaı qoıdy enshilese, ekinshi orynǵa bir qap qant, úshinshi oryn alǵan jigitke bir qap kartop berildi. Merekelik sharalarǵa sýsap qalǵan jurt, áı bir serpildi.
Shyǵys Qazaqstan oblysy
Ulan aýdany
