Oǵan sáıkes bankpen jasalǵan mámilelerdi aıaqtaý merzimi taǵy úsh aıǵa, 13 sáýirden bastap 12 shildege deıin uzartylady.
«Bul kórsetilgen kezeń ishinde banktiń shtattyq rejımde jumys isteı beretinin bildiredi. Bank klıentterine teńgemen jáne rýblmen júrgiziletin tólemder men aýdarym operasııalary (salyqtar, baj salyqtary, áleýmettik aýdarymdar) qandaı da bir shekteýlersiz qoljetimdi bolady», delingen habarlamada.
Buǵan deıin OFAC-tyń reseılik «SberBank» JAQ-qa jáne onyń enshiles uıymdaryna qatysty olardy SDN-ge (Specially Designated Nationals) qosýdy kózdeıtin oqshaýlaý sanksııalaryn engizetini týraly málimdegenin eske túsiremiz.
Kórsetilgen qarjy uıymymen jáne onyń basqa da enshiles qurylymdarymen operasııalar 2022 jylǵy 13 sáýirge deıin aıaqtalýǵa tıis.
«Tutastaı alǵanda, Qazaqstan SberBanki qarjylyq ornyqtylyqty kórsetip otyr jáne salymdarǵa, kredıtterge qyzmet kórsetýdi, sondaı-aq aqsha qarajatyn qabyldaý jáne berýdi qosa alǵanda, klıentter aldyndaǵy óz mindettemelerin ýaqtyly oryndaýda. Banktiń mindettemelerin óteý úshin ótimdiliktiń jetkilikti kólemin jınaqtaıtyn shamamen 1,6 trln teńge somadaǵy joǵary sapaly nesıe portfeli bar», delingen málimdemede.
Qazirgi tańda Qazaqstan SberBankinde 400 mlrd teńge mólsherinde kapıtaldyń jetkilikti qory bar.
Osylaısha, banktiń qarjylyq ornyqtylyǵy negizgi uıymnyń qosymsha qoldaýymen birge klıentterdiń tólemderi men aýdarymdaryna úzdiksiz qyzmet kórsetýge múmkindik beredi.
Bank depozıtterge mindetti kepildik berý júıesiniń qatysýshysy bolyp tabylady, bul Qazaqstan zańnamasynda belgilengen lımıtter sheginde azamattar qarajatynyń saqtalýyn qamtamasyz etedi.
О́z tarapynan, QR Qarjy naryǵyn retteý jáne damytý agenttigi bank sektoryndaǵy ahýalǵa kúndelikti monıtorıngteýdi júzege asyrady jáne, qajet bolǵan jaǵdaıda, syrtqy ekonomıkalyq táýekelderdiń qarjy naryǵynyń turaqtylyǵyna áserin álsiretý úshin qajetti sharalar qabyldaıdy.
