Áleýmettik jeli qoldanýshylary Zarechnyı kentindegi saıajaılarda bolǵan órtti sóndirýge kómektesken polıseılerge alǵystaryn bildirgen.
«Ranet» saıajaıshylar qoǵamdastyǵynda oryn alǵan alapat órt kezinde bizdiń kóshemizde ornalasqan 8 saıajaı ýchaskesin ottan aman alyp qalýǵa kómektesken Oıqala ýchaskelik polısııa pýnktindegi polıseılerge alǵys bildiremiz. Olar órt sóndirýshiler kelgenge deıin qol astyndaǵy zattarmen órtti aýyzdyqtaýǵa kómektesti, órt sóndirýshiler kelgennen keıin basqalarǵa kómek kórsetýge ketti», deıdi saıajaı turǵyndary.
О́rt 12 sáýir kúni keshke 10 gektarǵa jýyq aýmaqta oryn alǵan. Saıajaıdaǵy kóptegen úı-jaılar órtke orandy.
Shamamen saǵat 16:30-da №2 ýchaskelik polısııa pýnktiniń qyzmetkerleri Bylǵary zaýyty aýdanyndaǵy shaqyrtýdan kele jatyp, saıajaılar aýmaǵynda tútindi baıqaıdy. Bul týraly birden kezekshi bólimge habarlap, órt sóndirýshiler men saıajaıshylarǵa kómek kórsetken. Kóp uzamaı №2 ÝPP áriptesteri jáne jaqyn mańda ornalasqan birneshe ýchaskelik polısııa pýnkteriniń qyzmetkerleri kelgen.
Petropavl qalalyq Polısııa basqarmasy patrýldik polısııa batalonynyń qyzmetkerleri adam shyǵynyn boldyrmaý úshin saıajaıshylardy qaýipsiz ara qashyqtyqqa shyǵaryp, kúzetke turǵan.
«Turǵyndardyń biri gaz balonyn syrtqa shyǵarýdy surady. Biz úıge kirip, qaýipti zatty shyǵardyq. Taǵy bir saıajaıda dál osyndaı kómek kórsettik. О́rtti sýmen, kúrekpen sóndirdik. Kún jeldi bolǵanymen, birneshe úıdi órtten aman alyp qaldyq», dedi №2 ýchaskelik polısııa pýnktiniń aǵa ýchaskelik ınspektory Talap Baımaqambetov.
