«Bozoq» jobasynyń biregeıligi

Mazmundy is-shara ortaǵasyr­lyq tarıhty zertteýdiń ózekti máselele­rin talqylaý, tarıhı-mádenı mura eskertkishterin qaıta qurý jáne olar­dy nasıhattaýda halyqaralyq tájirıbelerdi zerdeleýge arnaldy.

Búginde Qazaqstan men Túr­kııa arasyndaǵy dostyq, baýyr­las­tyq eki el arasyndaǵy saıası jáne saýda-ekonomıkalyq qaty­nas­tardy ǵana emes, mádenı-gýma­nı­tarlyq baılanystardy damy­týǵa da mán berilgen. Ásirese buǵan túr­kitildes halyqtardyń tarıhı tamyry men mádenı qundy­lyqtary ortaqtyǵynyń yq­paly mol. Son­dyq­tan qos memleket ǵalymdary arasyndaǵy baı­la­nys tarıhı-máde­nı murany zertteý, saqtaý jáne reprezentasııalaý máselelerin sheshýde úlken ról atqarady.

Semınarda Mádenıet jáne sport mınıstrligi Mádenıet ko­mıteti tór­aǵasynyń orynbasary Maqsat Ar­ǵynbekov jıynnyń maqsatyna toq­tala kelip, «Bozoq» jobasynyń eli­mizdiń tarıhı-mádenı murasyn da­mytýdaǵy bolashaǵy zor ekenin aıtyp, ony Úkimet tarapynan Má­de­­nıet jáne sport mınıstrligi qol­­daıtynyn atap ótti. Sondaı-aq «Bo­zoq» mýzeı-qoryǵynyń dırektory Sáýle Býrbaeva ashyq aspan astyn­daǵy «Bozoq» ulttyq parkin qurý jo­basyn tanystyrsa, Túr­kııa Mádenıet jáne tý­rızm mınıstrligi Kolleksııa­lar basqarmasy fılıalynyń dı­rektory Azıme Evrensel «Bo­zoq» jobasynyń biregeıligine tań­ǵalyp, tarıhı-mádenı murany saqtaıtyn osyndaı aýqymdy jobalar álemde sırek kezdesetindigin sóz etti. Qazaqstandaǵy TIKA úıles­tirýshisi Hıkmet О́zdenoýlý Túrkııa tarapynan jobany iske asyrýda ynty­maqtastyqqa daıyn ekendigin aıtyp, tájirıbe almasý úshin Túrkııanyń mýzeı isiniń jetekshi mamandaryn Qa­zaq­stanǵa jiberý týraly usynysyn jetkizdi.

Is-shara barysynda Qazaqstan­nyń mýzeı qyzmetkerleri úshin Túr­kııanyń jetekshi mádenı jáne ǵy­lymı ortalyqtaryna taǵy­lym­da­ma­ uıymdastyrý, sol el­diń al­dyńǵy qatarly ǵylymı jáne mý­zeı ortalyqtarynyń res­tav­ra­sııa­laýdaǵy, konserva­sııa­laýdaǵy halyq­aralyq jumys tájirıbesin zerde­leý men mádenı mura salasyndaǵy jetis­tikterin jurtshylyqqa tanytý máseleleri qozǵaldy. Sonymen qatar «Bozoq» jobasyn iske asyrýda ashyq aspan astyndaǵy mýzeılerdegi tarıhı-mádenı murany reprezentasııa­laý jónindegi usynym talqylandy.