Sóıtip qazirgi zamannyń da ózindik mal qorǵaý ádisi tabylyp jatyr. Bir kezde mal ıeleri jylqylardyń moınyna qońyraý taǵyp qoıatyn. Ury áketip bara jatqan maldyń qońyraýy shyldyrlap qoıa bergende jylqyshy onyń qoldy bolǵanyn birden seze qoıatyn. Tipti úıirden bólinip ketip, teris jaıylǵan maldy tabýǵa da qońyraýdyń paıdasy kóp tıetin edi. Sol sııaqty qazir mal shuǵyl qýylyp nemese jaıylym aýmaǵynan shyǵyp bara jatsa elektrondy chıp arqyly smartfonǵa qońyraý túsedi. Ar jaǵy belgili, mal ıeleri, jylqyshy – bári dereý dabyl shyqqan jaqqa attanady...
Qazir Soltústik Qazaqstan oblysynda birneshe fermer maldy osylaı baqylaýǵa alǵan. Sonyń ishinde Ýálıhanov aýdanynda jylqy ósiretin eki azamat osynaý zamanaýı tehnologııalardy paıdalanýda. Olardyń birinde 40 bas, ekinshisinde 60 bas jylqy bar. Ekeýi de GPS-trekerlerdiń paıdasy kóp ekenine kózin jetkizip otyr. Tabyndaǵy bir jylqyǵa arnaıy elektrondy baý taǵylsa, tutastaı bir úıirdiń qaıda júrgenin baqylaýǵa bolady deıdi olar.
Polıseıler de GPS-trekerlerdi ornatý – maldy qylmystyq qol suǵýdan qorǵaýdyń tıimdi joldarynyń biri ekenin aıtyp otyr. Tártip saqshylary mal urlyǵyn boldyrmaý boıynsha profılaktıkalyq jumysty aýyl turǵyndarymen únemi júrgizip otyrady.
«Mal urlyǵyn boldyrmaý – negizgi mindetterimizdiń biri. Aýdandaǵy iri sharýashylyqtardyń barlyǵy maldy uıymdasyp baǵyp, birneshe baqtashy jaldaǵan. Olar kezekpen baǵyp, mal qaraýsyz qaldyrylmaıdy. Qazirgi ýaqytta halyqpen jınalystar ótkiziledi, onda turǵyndar, baqtashylar jáne ýchaskelik polısııa ınspektorlary iri qara maldyń jaıylýyn uıymdastyrý máselelerin sheshedi. Ýchaskelik polısııa ınspektorlary baqtashylarmen áńgimeler júrgizedi, urlyqtyń aldyn alýǵa, joldyń ústine shyqqan janýarlardyń kesirinen oryn alatyn jol-kólik oqıǵalaryn boldyrmaýǵa yqpal etetin erejelerdi túsindiredi», deıdi polısııa bóliminiń bastyǵy podpolkovnık Rýslan Álıjanov.
Osyndaı jumystar oblystyń barlyq aýmaǵynda júrgizilýde. Sonyń nátıjesinde, mal urlyǵynyń sany jyl saıyn azaıyp keledi. Eger 2019 jyly 92 mal urlyǵy tirkelse, 2020 jyly – 47, 2021 jyly 29 fakti tirkeldi. Bıyl 3 aıda 3 mal urlyǵy boldy.
Soltústik Qazaqstan oblysy
