Dámhanaǵa kirip samaýrynnyń mán-jaıyn surastyryp kórip edik, eshkim mardymdy jaýap bere almady. Qalalyq mýzeı qyzmetkerlerine habarlasyp edik, ol kisiler surastyryp júrip, aqyry jergilikti kásiporyndardyń birine tıesili ekenin anyqtap berdi.
«Araı Holdıng» kompanııasyna enshiles kásiporynda kadr bóliminiń basshysy bolyp jumys isteıtin Irına Kahovskaıanyń aıtýynsha, alyp samaýryn Polshadaǵy tańdaýly ustahanalardyń birinde arnaıy tapsyryspen jasalypty. Tutastaı mystan quıylǵan. Samaýrynnyń qaqpaǵy ashylady, shúmegi de buralady. Ishine sý toltyryp kádimgideı shaı qoıýǵa bolady. Bir ereksheligi, kómirmen janady eken.
– Mys samaýryn turǵan jer búginde Lısakov qalasynyń kórneki oryndarynyń birine aınaldy desek bolady. Alystan kelgen qonaqtardy sol jaqqa aparamyz. Jol boıy arly-berli tolassyz ótip jatqan kólikter de bir sátke aıaldap, samaýrynnyń túbinde turyp sýretke túsip ketedi. Bir sózben aıtqanda, ashyq aspan astyndaǵy jalǵyz eksponatty mýzeı sııaqty ǵoı, – dedi I.Kahovskaıa.
Irına úıdeı samaýrynǵa neshe lıtr sý ketetinin tap basyp aıtyp bere almady. Alaıda qala turǵyndary 400-450 lıtrdeı sý qaınatýǵa bolady dep shamalaıdy. Iаǵnı bir qaınaǵanda bir jarym myńnan astam adamǵa shaı berýge bolady eken. Dáý samaýryn ońaılyqpen sýymaıtyn kórinedi, ishindegi qaınaǵan sý bir saǵattyń ishinde nebári 2-aq gradýsqa tómendeıdi eken.
Qostanaı oblysy,
Lısakov qalasy
