Brıfıngke Ekonomıkalyq ıntegrasııalar jumysynyń mınıstri Janar Aıtjanova, Aýyl sharýashylyǵynyń mınıstri Asyljan Mamytbekov, Indýstrııa jáne jańa tehnologııalar birinshi vıse-mınıstri Albert Raý, Ekonomıkalyq damý jáne saýda vıse-mınıstri Tımýr Jaqsylyqov qatysyp, kún tártibindegi másele boıynsha qoıylǵan suraqtarǵa jaýap berdi. «Eýrazııalyq ekonomıkalyq odaq qurý usynysy osydan 20 jyl buryn bizdiń Memleket basshysy tarapynan Máskeýde jasalǵany belgili. О́tpeli kezeń artta qalyp bara jatqan qazirgi ýaqytta, osy kúnge deıin kún tártibinen túspegen Eýrazııalyq ekonomıkalyq odaq qurý sharasy qaıta kóterilip, onyń qurylýynyń alǵashqy kezeńi aıaqtalýǵa taıaý.
Buıyrtsa, osy aıdyń sońyna deıin tıisti qujattar tolyq ázirlenip bolsa, keler mamyr aıynyń sońyn ala Qazaqstan, Reseı, Belarýs elderiniń Memleket basshylary Odaqty qurý jónindegi shartqa qol qoıady»,-dedi B. Saǵyntaev. B. Saǵyntaev sóz oraıynda elimizdegi keıbir buqaralyq aqparat quraldarynda, onyń ishinde elektrondy aqparat jelilerinde osy másele jóninde kóptegen pikirler aıtylǵanyna da toqtalyp ótti. Oǵan qoldaý jasap otyrǵandar da, qarsylyq bildirip jatqan azamattar da bar. EEO týraly sharttyń aınalasyndaǵy keıbir túsinispeýshilikter aqparattardyń tolyqqandy bolmaýynan da týyndaýy yqtımal. Sondyqtan baıandamashy kóńilge kúdik uıalatatyn osyndaı pikirlerge baılanysty Eýrazııalyq ekonomıkalyq odaq – tek qana ekonomıkalyq ıntegrasııa ekenin qadap aıtty. Eń bastysy, EEO saıası uıym emes.
Nurbaı Elmuratov.
Derekkóz: Egemen.kz.
Foto: Ortcom.kz.
