Búgingi rásimniń ereksheligi sol, «Kóktem-2022» shaqyrylymynyń sharasyna jas sarbazdardyń ata-ana, týǵandary men dostary qatysyp, qýanyshtarymen bólisti.
Bul – pandemııanyń beti qaıtyp, karantındik shekteýler alynǵannan keıingi birinshi ótkizilip otyrǵan dástúrli shara. Sondyqtan, ant berý sekildi uldarynyń ómirinde bir-aq ret bolatyn ataýly merekege qatysý úshin alystan at aryltyp jetken ata-analardyń júzderinen qýanysh pen erekshe tolqynys baıqalady.
Podpolkovnık E.Qyrǵyzbaevtyń buıryǵymen ashylǵan saltanatty sharaǵa 80-nen astam sarbaz sap túzedi. Atalǵan basqarmanyń kásibı-tehnıkalyq jáne daıyndyq bóliminde áskerı ómirdiń alǵashqy álippesimen tanysyp, sanaýly ýaqyttyń ishinde ózderiniń saptyq daıyndyqtaryn shyńdaǵan Otan oǵlandaryn alda jas jaýyngerler kýrsy kútip tur. Ári qaraı, el shebine attanyp, UQK Shekara qyzmetiniń shekara bólimshelerinde alǵan mamandyqtary boıynsha qyzmet atqaratyn bolady. Kýrsta dızelshi-elektrık, avtodánekerleýshiler daıarlanady.
Elimizdiń Ánuranymen ashylǵan saltanatty sharaǵa áskerı ujymnyń týy ákelingen soń Tehnıkany jáne qarý-jaraqtardy jóndeý basqarmasynyń bastyǵy, podpolkovnık Ernat Qyrǵyzbaev sap túzegen sarbazdardy ant qabyldaý rásimimen quttyqtap, shekara men el shebiniń elimiz úshin alar mańyzyna keń toqtaldy.
Budan keıin bolashaq shekarashylardyń Otanyna ant berý rásimi de bastaldy.
Ant qabyldaý rásiminde sóz alǵan UQK Shekara qyzmetiniń ardageri, bir kezderi atalǵan basqarmany basqarǵan zapastaǵy polkovnık Álıhan Artyqbaev shekara shebin qorǵaǵaly turǵan jas býynnyń qadamyna sáttilik tiledi. Munan keıin ata-analar atynan sóz alǵan Oryntaı Ospanova búgin óziniń nemeresi Álıhannyń da sarbaz atanǵanyn, shekarashy bolýǵa ózi tilek bildirgenin maqtanyshpen aıtyp, Otan qorǵaýǵa ant berýshilerge analyq batasyn berdi.
Jıyn sońynda ata-analar basqarma basshylyǵymen kezdesip, ózderin tolǵantqan saýaldardyń jaýabyn aldy.
