Jambylda tuńǵysh ret «Qazaq kúresi» klýby ashylady

Jambyl oblysynyń Taraz qalasynda tuńǵysh ret «Qazaq kúresi» klýby ashylady. Bul týraly Munara.kz habarlady. Týrasyn aıtqanda, bul klýb Taraz shaharynda ǵana emes, Qazaqstan boıynsha alǵash ret ashylǵaly otyr. Qazir osy klýbtyń boz kileminde beldesýge nıet bildirgen balýandardyń qatary 1300-den asty. Alaıda, bul jerde ár aımaqtan iriktelgen myqtylar ǵana jattyǵa alady. Qazirgi kezde oblys ákiminiń tikeleı tapsyrmasymen jańa klýb jóninde uıymdastyrý jumystary júrgizilýde. Al keler jyly «Qazaq kúresi» klýbynyń irgetasyn qalaý josparlanǵan.«Dál qazir klýbtyń is-qaǵazdary men materıaldyq bazasy talqylanyp jatyr. Al balýandar «Taraz-Arena» kesheninde ýaqytsha shynyǵatyn bolady. Kelesi jyly jańa nysannyń qurylysy bastalady. Sol kezde klýb tolyqtaı óz jumysyna kirisedi.Negizi, mundaı klýb buryn-sońdy elimizde ashylǵan emes. Al alǵashqy qazaq kúresi klýbyn Áýlıeata óńirinde ashý máselesine keler bolsaq, biz bul usynysqa bir aýyzdan qoldaý bildirdik. Sebebi, «Eýrazııa-Barysy», «Qazaqstan-Barysy» Beıbit Ystybaevtaı balýandy shyǵara bilgen Jambyl jerinde qazaq kúresi myqtap damyǵan. Sondyqtan bul klýbty bolashaq «chempıondar mektebi» desek, tolyq negiz bar, – deıdi oblys ákimdiginiń dene shynyqtyrý jáne sport basqarmasynyń basshysy Gamlet Qaınarbekov. Ámirhan Almaǵanbetov. Derekkóz: Munara.kz. Foto: www. Avestnik.kz.