Almaty qalasy ákimdiginiń qoldaýymen ornatylǵan eskertkishtiń ashylý saltanatyna shahar basshysy Erbolat Dosaev, Qazaqstannyń Eńbek Eri Asanáli Áshimov, Qazaqstannyń Eńbek Eri Álibek Dinishev, Qazaqstannyń halyq ártisi Altynbek Qorazbaev, aqyn, Memlekettik syılyqtyń laýreaty Aqushtap Baqtygereeva, mádenıet qaıratkeri Qýanysh Ábdiqalymov, ánshiniń týystary – uly Tájen men Maral Baǵlanovtar qatysty.
«Bizdiń uly ánshimiz Roza Baǵlanovaǵa eskertkish ornatý – onyń murasyn qurmetteý jáne este saqtaý. Ol mýzyka óneriniń shyrqaý bıigindegi jaryq juldyz boldy. Onyń erekshe daýysy men talanty halqymyzdyń baǵa jetpes qundylyǵyna aınaldy. Ánshiniń súıikti qalasy – Almatyda 100 jyldyq mereıtoı aıasynda Roza Baǵlanovanyń esimin máńgi este qaldyrý úshin eskertkish ornatqanymyzǵa sheksiz qýanyshtymyz», dedi Erbolat Dosaev. Qala ákimi birneshe býyn urpaqqa ónerimen úlgi bolyp, aty ańyzǵa aınalǵan ánshiniń qazaq halyq mýzykasy men Qazaqstan kompozıtorlary shyǵarmashylyǵyn damytýǵa jáne nasıhattaýǵa qosqan baǵa jetpes úlesin keńinen atap ótti.
Qazaq ónerine qaıtalanbas iz qaldyrǵan tarıhı tulǵanyń eskertkishi kompozısııalyq sheshiminiń shymyrlyǵymen kóz tartady. Qola jáne granıtten jasalǵan eskertkishtiń bıiktigi – 4,8 metr. Avtorlary – D.Aǵzamov, Ý.Aqjoltaı, A.Jamhan, A.Qabyl. Úlken shyǵarmashylyq órleýdiń izi baıqalatyn talantty músinshilerdiń týyndysynda kúlimdegen júzine búrmeli kóılegi men oıýly beshpenti, úlpildegen úkili taqııasy jarasqan kúmis kómeı ánshi dál osy sát sahnada «Ah, Samara gorodok» ánin syzylta salyp turǵandaı áser qaldyrady. Tastuǵyrdyń ústinen tutas bir dáýirdiń ulttyq beınesi tónip turǵandaı. Sahnany serik etken sanaly ǵumyrynda qazaqtyń ulttyq kıimi men sán-saltanatyn nasıhattap ótken ultjandy ánshiniń obrazynan kúlli halqymyzdyń bolmysy men ómir saltynyń ańǵarylyp turýy – bıik sheberliktiń jemisi. Ásem Almatynyń árin kirgizgen ánshi músini jıyrmadan astam jobanyń ishinen úzdik dep tanylyp, ashyq baıqaý nátıjesinde tańdalyp alynǵan.
Jyldar ótken saıyn erekshe daryn ıesine saǵynyshy údeı túsken el-jurtynyń qurmeti keshkilik Respýblıka saraıynda ótken «Aqmańdaılym» atty merekelik konsertpen jalǵasyn tapty. Qazaqstannyń eńbek sińirgen óner qaıratkerleri men tanymal ánshilerdiń oryndaýynda Roza Baǵlanovanyń repertýaryndaǵy belgili ánder shyrqalyp, derekti fılm kórsetildi. Áıgili ájesiniń qurmetine Úrbıbi degen esimdi ıelengen nemeresi án salyp, Baǵlanovtar áýletindegi óner sabaqtastyǵy eshqashan úzilmeıtinin balǵyn únimen bir baıqatty. Saǵynyshqa toly sazdy kesh saf óner men sulýlyqtyń sımvolyndaı bolǵan halyqtyń súıikti qyzyna kórsetiletin qurmet pen taǵzymnyń máńgi tolastamaıtynyn sezindire tústi.
ALMATY
