Qytaıdaǵy qazaqsha smartfon

Qytaıdyń joǵary oqý ornyn endi ǵana támamdaǵan qos qandasymyz Muhammed Nuhtarhan men Qaıyrymbek Kákimniń bastamashy bolýymen «Áz baba» markaly qazaqtildi smartfon jasalyp, Qytaı bazaryna shyqty, dep habarlady BAQ.KZ tilshisi. «Burynnan beri jeke saıtymyzda qazaqtildi androıd baǵdarlamalaryn jasap júrgen bizder úshin «Áz baba» markaly qalta telefonyn jaryqqa shyǵarý asa qıynǵa túsken joq. Jarym jylǵa jýyq ýaqyt ishinde baǵdarlamalaryn jasap, termınderdi bir izge keltirip, eń alǵashqy tóte jazýly smartfondy dúnıege ákelip otyrmyz», deıdi Shanshı pedagogıka ýnıversıtetin bıyl ǵana bitirgen Muhammed Nuhtarhan. Qazaq tilin biletinder ǵana qoldana alatyn atalmysh smartfonnyń basty ereksheligi – onda ulttyq oıyndar ornatylyp, tól taǵamdarymyzdy daıarlaý tásilderin tehnıka tilinde tamasha sóılete bilgendiginde. Sondaı-aq, eki dos ult rýhanııatynda orny erekshe qazaqsha kitaptar men dinı saýattylyqty damytýǵa arnalǵan ádebıetterdiń elektrondy nusqalaryn da telefonǵa engizgen eken. Jeke saıttarynyń ózi «Áz baba» (www.azbaba.com) dep atalatyn baýyrlarymyzdan nege bul atty tańdaǵandaryn surap bilgenimizde, olardan: «Atam zamannan áz babalarymyz bilektiń kúshimen, naızanyń ushymen at ústinde júrip qarsy kelgen dushpandy joıyp, eldi, jerdi qorǵady. Sol rýhty jalǵasaq degen nıetpen at qulaǵynda oınamasaq ta, osynaý tehnıka zamanynda ózgege esemizdi jibermeı kompıýter álemin meńgersek dedik. Sondyqtan eń aldymen «Áz baba» saıtyn quryp, androıdtyq júıedegi barlyq baǵdarlamalardy qazaqshalap qana qoımaı, tyń dúnıeler jasaýǵa kiriskenbiz. Sol jumysymyzdyń arqasynda áz Naýryzda «Áz babany» bazarǵa shyǵardyq», degen mazmundaǵy jaýap aldyq. Al, Muhammedtiń aıtýynsha, «Áz baba» saıtynda tehnıka tilin qazaqsha «saıratýdy» maqsat tutqan bir top qazaq jastary jumys jasaıdy eken. «Jumyla kótergen júk jeńil» degendeıin, jańa telefonnyń jaryq­qa shyǵýyna osy dostarym kóp eńbek sińirdi. Olarǵa aıtar alǵysymyz sheksiz!», deıdi ol. Odan bólek qazaqy úlgidegi fleshkalar men balalar oıynshyǵyn jasap shyǵaryp, halyqqa taralýyna atsalysyp júrgen jas­tar «Áz baba» uıaly telefonynyń ekinshi jańarǵan nusqasyn da ázirleýdi josparlap otyr. «Endi biz «Áz baba» sensorly telefonynyń jańartylǵan úlgisin jasamaqpyz. Ásirese, kelesi nusqasyn oıý-órnektermen áshekeıleýdi kózdep otyrmyz», – deıdi Qytaı Ekonomıka ýnıversıtetiniń túlegi Qaıyrymbek Kákim. «Egemen-aqparat».