Baba rýhyna taǵzym etýmen bastalǵan sharany bilim ordasynyń basshysy Janseıit Túımebaev quttyqtaý sózben ashyp, «Ál-Farabı fenomeni – shyn máninde teńdesi joq qubylys. Ál-Farabı – uly oıshyl ǵana emes, adamzattyń rýhanı órleýine yqpal etken planetarlyq deńgeıdegi ǵulama ǵalym. Forýmnyń tarıhı mıssııasy – Farabı ilimi arqyly jastardyń oı-órisin keńeıtý. Tarıhı jáne zamanaýı qundylyqtardy toǵystyrý arqyly farabıtanýdaǵy jańa baǵyttardy damytý, Farabı ilimin jan-jaqty, sala-salaǵa bólip talqylaý», dep atap ótti.
Jıynda sóz alǵan О́zbekstan Respýblıkasynyń Almatydaǵy bas konsýly Abror Fathýllaev ǵalymnyń baǵa jetpes baı murasynyń jalpyadamzattyq mańyzyna toqtaldy. «Uly ál-Farabı óz zamanynda barlyq ǵylym salasyna úlken úles qosty. Ortaǵasyrlyq oıshyldardan alǵashqy bolyp áleýmettik ómir qurylymynyń erekshelikteri týraly ilimniń negizin qalady. Ol shyn máninde álem ǵalymy retinde rýhanı qundylyqtardy biriktirdi. Ál-Farabı shyǵarmalary orta ǵasyrlar men qaıta órleý dáýirinde Eýropadaǵy dúnıetanym men ǵylymǵa tikeleı áser etti. Álem, gýmanızm jáne ádilettilik týraly dúnıetanymy jańa syn-tegeýrinder men qaýip-qaterlerge kezikken kezeńde asa ózekti», dedi bas konsýl óz sózinde.
Forýmǵa arnaıy qatysqan Túrkitildes memleketter ıntegrasııalyq keńesi bas hatshysynyń orynbasary Adahan Madýmarov jastarǵa sát-sapar tiledi. Ol óz sózinde «Jas ǵalymdardyń úzdik jumystaryn tamashalaý barysynda bolashaǵy zor ǵylymı zertteýlerge kýá boldyq» deı kelip, «Aqyldy kúnhana» jobasynyń mańyzdylyǵyna, eshki sútinen jasalǵan irimshik jobasynyń halyq densaýlyǵy úshin asa qajet ekendigine toqtaldy. Al jahandaný órkenıetinen tys qalmaý úshin jastar zamanaýı jobalardy júzege asyra bergeni abzal.
Ýnıversıtet rektory J.Túımebaev osy oraıda I Halyqaralyq Farabı forýmynyń el ıgiligi jolynda dástúrli shara retindegi mańyzyna toqtaldy. Bilim men ǵylymnyń qara shańyraǵy úzdik dástúrlerdi saqtaı otyryp, irgeli jáne qoldanbaly zertteýler, tehnologııalardy kommersııalandyrý sheńberinde jas ǵalymdar men stýdentterdiń halyqaralyq ǵylymı-tehnıkalyq yqpaldastyǵyn damyta beretin bolady. Búginde granttyq qarjylandyrýdyń 10 paıyzy stýdentterdiń ǵylymı-zertteý qyzmetine baǵyttalǵan.
Forým jas ǵalymdardyń jetistikterin pash etýmen erekshelendi. «QazUÝ-dyń úzdik jas ǵalymy» baıqaýy men Stýdenttik bıznes-ınkýbatorlar ınnovasııalyq jobalarynyń jeńimpazdary marapattalyp, arnaıy dıplomdar men qarjylaı syılyqqa ıe boldy.
Úzdik ınnovasııalyq stýdenttik jobanyń avtorlary – QazUÝ-dyń fızıka-tehnıkalyq fakýltetiniń stýdentteri Dınara Jumalına men Qaldygúl Káribaevaǵa Ι dárejeli dıplom men 150 myń teńge qarjylaı syılyq tabystaldy. Bul joba múmkindigi shekteýli jandarǵa arnalǵan arnaıy sýrdoaýdarmany HandDetector qosymshasy kómegimen daıyndaýǵa baǵyttalǵan. Joba avtorlarynyń aıtýynsha, álemde 2 mln adam ymdaý tilimen sóılesedi. Baǵdarlama osyndaı múmkindigi shekteýli jandardyń is-qımyldaryn basqa adamdarǵa túsindirýge kómektesedi.
Forým ǵalymdar men stýdent jastardyń ǵylymı shyǵarmashylyǵynyń túrli baǵyttaryn biriktire otyryp, 6 myńnan astam qatysýshy ǵylymı jetistikter, zııatkerlik oıyndar, dóńgelek ústelder, ǵylymı debattardyń kýási boldy. Sonymen birge stýdenttik bıznes-ınkýbatorlardyń ınnovasııalyq jobalary kórmesimen tanysty. Forým barysynda elimizge belgili ǵalymdar óz tájirıbelerimen bólisip, baıandama jasady.
ALMATY
