Byltyrǵy el birinshiliginiń jeńimpazy «Saryarqa» pleı-off kezeńiniń jartylaı fınalynda elordanyń «Nomadymen» kezdesip, qaraǵandylyq hokkeıshiler sońǵy, sheshýshi matchta qarsylastyryn iri eseppen jeńip, jarystyń fınalyna shyqty. Jalpy esep – 4:2. Al jartylaı fınaldyń ekinshi jubynda óner kórsetken Kókshetaýdyń «Arlany» jetinshi kezdesýde Atyraýdyń «Beıbarysyn» 2:1 esebimen qapy qaldyryp, jalpy serııada 4:3 nátıjesimen fınaldyq saıysqa joldama aldy.
Eki fınalıst arasyndaǵy alǵashqy kezdesý Qaraǵandydaǵy alty myńǵa jýyq jankúıer syıatyn «Qaraǵandy-Arena» muzaıdynynda ótip, qaraǵandylyq komanda kútpegen jerden «Arlannan» jeńilip qaldy. Qaraǵandylyq hokkeıshiler matchtyń birinshi kezeńinde kókshetaýlyqtardyń qaqpasyna tolassyz shabýyl uıymdastyrǵanymen, Ilıa Rýmıansev qorǵaǵan qaqpadan sańylaý taba almady. Degenmen ekinshi kezeńniń 36-mınýtynda muzaıdyn ıelerinen Mıhaıl Rahmanov mergendik tanytyp, maqtaýly Rýmıansevten aılasyn asyrdy. Úshinshi 20 mınýttyqta oıynǵa ózgeris jasaǵan qonaqtar aınaldyrǵan tórt mınýttyń ishinde eki shaıba soǵyp, tarazy basyn ózderine aýdardy. 44-mınýtta Roman Berdnıkov oıyndaǵy esepti teńestirse, 48-mınýtta Roman Graborenko komandasynyń ekinshi shaıbasyn soǵyp, mańyzdy jeńis syılady – 2:1.
Araǵa bir kún salyp eki komanda Qaraǵandyda ekinshi oıynyn ótkizdi. Bul kezdesýde de kókshetaýlyq komanda jeńiske bir taban jaqyn turǵan edi. Alaıda overtaımda myqtylyq tanytqan «Saryarqa» oıynshylary jeńisti julyp aldy – 4:3. Osylaısha, alǵashqy eki oıynnan keıin serııadaǵy esep teńesti.
Birinshi kezeńde muzaıdyn ıelerinen Kırıll Belıaev dýbldiń avtory atansa, qonaq komanda sapynan Aleksandr Menshıkov pen Vıtalıı Jılıakov gol soqty. Al úshinshi kezeńde Vladımır Borovkov «Arlandy» alǵa shyǵarǵanymen, match aıaqtalar tusta Mıhaıl Rahmanov tarazy basyn teńestirip ketti. Sóıtip, oıyn overtaımǵa ulasty. Qosymsha ýaqytta Aleksandr Borısevıch mergendigimen kózge túsip, «Saryarqaǵa» jeńis syılady. Serııanyń kelesi matchtary Petropavlda ótedi.
2021/22 jylǵy týrnır reglamentine sáıkes, ½ fınaldyń qorytyndysy boıynsha jeńiliske ushyraǵan jáne turaqty chempıonattyń nátıjesi boıynsha joǵary oryn alǵan «Beıbarys» bıylǵy Pro Ligasy-nyń qola júldegeri atandy.
