«Prezıdent sheteldik ýnıversıtetterdiń keminde bes fılıalyn ashýdy tapsyrdy. Elde Montfort (Lester) ýnıversıtetiniń fılıaly jumys isteıdi. Sondaı-aq Qozybaev atyndaǵy SQO ýnıversıtetiniń bazasynda Arızona ýnıversıtetiniń fılıaly qurylady. Sondaı-aq Atyraý men Almatyda jetekshi sheteldik tehnıkalyq ýnıversıtetter ashylady. Qazir taraptar kelissózder júrgizip jatyr», dedi Bilim jáne ǵylym mınıstri Ashat Aımaǵambetov.
Onyń aıtýynsha, kadrlardy sapaly daıarlaý úshin baqylaý eki baǵytta júrgiziledi. Birinshisi - lısenzııadan aıyrý nemese sapasyz JOO nemese kolledjdi jabý. Ekinshisi - joǵary oqý ornyn nemese kolledjdi beıindeý, lısenzııaǵa beıindi emes jáne talap etilmegen qosymshalardy qaıtarý.
«Qazirgi ýaqytta 15 joǵary oqý orny men 31 kolledj jabyldy. Taǵy 4 JOO men 29 kolledj jabylý satysynda. 61 JOO-daǵy lısenzııalarǵa 500 qosymshany jáne 375 kolledjdegi 2200 qosymshany qaıtarý qamtamasyz etildi. Pedagogtardy daıarlaıtyn joǵary oqý oryndarynyń sany 86-dan 50-ge deıin azaıdy. Al zańgerlerdi daıarlaıtyn joǵary oqý oryndarynyń sany 72-den 61-ge deıin qysqardy», dedi BǴM basshysy.
Ol bul baǵyttaǵy jumystar áli de jalǵasatynyn aıtty.
«IT» jáne «Týrızm» mamandyqtary boıynsha biliktilik talaptaryna ekonomıkanyń naqty sektorynan praktık-mamandardy tartý boıynsha ózgerister engizildi delik. Tek professorlar ǵana emes, sonymen qatar praktıkter, mysaly, baǵdarlamashylar da sabaq berýi kerek. Olardyń oqý oryndaryna kelip, óz tájirıbelerimen bólisýi mańyzdy. Sondaı-aq 5 jyl merzimge lısenzııalaý engizildi. Bul erejeni Májilis pen Senat qoldady», dep qosty Ashat Aımaǵambetov.
