2022 jyly naýryzda Ýkraınadaǵy Qazaqstannyń elshiligi ýaqytsha Lvov qalasyna kóshirildi. Sondaı-aq eki qyzmetkerimiz Polsha men Moldovadaǵy bizdiń eldiń elshilikterine ýaqytsha issaparǵa jiberildi.
Elshi Darhan Qaletaev jaqynda keńesý úshin Qazaqstanda bolyp, onyń qorytyndysyna sáıkes, endigi kezeńde eki qyzmetkerdi – áskerı attashe men kezekshi komendantty Kıev qalasyna qaıtarý týraly sheshim qabyldandy.
«Elshimiz ben ondaǵy basqa qyzmetkerler Lvov pen Kıevtiń eki arasynda júredi, óıtkeni Kıevtegi elshiligimizdiń keńse ǵımaraty qajetti jumys pen konsýldyq qyzmet kórsetýge beıimdelgen, sonymen qatar qujat aınalymy jáne taǵy basqasy úshin barlyq qajetti tehnıkalyq kommýnıkasııalarǵa ıe», dedi QR SIM resmı ókili Aıbek Smadııarov.
Elshi qyzmetkerleriniń Lvovqa kelip ýaqytsha ornyǵýy bizdiń azamattarymyz ben qandastarymyzdy osy qaladan evakýasııalaý prosesiniń jalǵasyp jatýy, sonyń ishinde olardyń qaýipsizdigin qamtamasyz etý máselesimen de túsindiriledi.
QR elshiligin Kıevke tolyqtaı qaıta ornalastyrý týraly túpkilikti sheshimdi elshiniń usynysy boıynsha QR Syrtqy ister mınıstri qabyldaıdy.
Aıana Toǵanbek
