Shyǵys – elimizde sút óndirýden kósh bastap otyrǵan óńir. Keıingi jyldary sút óndirýdiń ınnovasııalyq tehnologııasy aımaqta keńinen engizile bastady. Osydan eki jyl buryn Glýbokoe aýdanynyń Bobrovka aýylynda iske qosylǵan robottandyrylǵan sút saýý apparaty endi ózge sharýashylyqtarǵa da shet emes. Jýyrda Borodýlıha aýdanyndaǵy «E.Záıtenov» sharýa qojalyǵynyń bazasynda tolyq avtomattandyrylǵan mal sharýashylyǵy kesheniniń ashylýyna kýá boldyq.
Bul sharýa qojalyǵy sıyrdy robot arqyly saýatyn osy óńirdegi ekinshi sharýashylyq. Elimizde jańa tehnologııany birinshi ret engizgen Shyǵys Qazaqstan oblysy ınnovasııalyq saýý apparatynyń sany jaǵynan da kósh bastaýda.
Avtomattandyrylǵan keshen mal sharýashylyǵyndaǵy kiristi arttyrýǵa úlken múmkindik beredi. Sáıkesinshe, ondaǵy shyǵyn kólemi aıtarlyqtaı azaıady. Máselen, robottardyń kómegimen ár sıyrdan jylyna 4,5 myńnan 6,5 myń lıtrge deıin sút alynbaq.
Sharýashylyq jetekshisi Erlan Záıtenovtiń aıtýynsha, avtomattandyrylǵan fermada 30 sıyr saýylady. Aldaǵy ýaqytta jelini jer syzǵan iri qara sanyn arttyrý kózdelip otyr. О́ıtkeni, avtomattandyrylǵan keshende iske qosylǵan tórt apparattyń qýaty 240 sıyrdy saýýǵa erkin jetedi.
«Deleval» atty shvedtik navıgasııaly-jyljymaly tehnologııanyń jumys isteý barysymen tanysa kele, ferma qyzmetiniń zamanaýı baǵytta qurylǵanyn baıqadyq. Birinshiden, jabyq keshenniń ishi óte keń ári jaryq. Ekinshiden, sútti sıyrlarǵa jem-shóp súrlemi mólsherimen ýaqytynda beriledi. Úshinshiden, maldyń astyndaǵy qaldyqtar jyljymaly tehnologııa boıynsha syrtqa shyǵarylyp turady. Tórtinshiden, maldyń qıy arnaıy súzgiden ótken soń tyńaıtqysh retinde egistik alqaptaryna jóneltiledi. Besinshiden, ár iri qaraǵa chıp taǵylǵan. Saýý ýaqyty kelgende chıp arqyly kompıýterlik ortalyqqa dabyl berilip, jelini syzdaǵan sıyr apparat janyndaǵy qorshaýǵa kirgiziledi. Altynshydan, jelinge saýý apparaty lazerli avtomat arqyly kıgiziledi de, saýý jumysy bastalady.
– Memleket basshysy Nursultan Nazarbaev aýyl sharýashylyǵy nysandarynyń zamanaýı jańa tehnologııalarmen jabdyqtalýy jóninde naqty tapsyrmalar júktegen bolatyn. Bul aýyl sharýashylyǵy ónimderin arttyrýǵa múmkindik beredi. Elimizdi azyq-túlikpen otandyq kásipkerlerdiń ózderi qamtamasyz etýine jol ashylýy tıis. 300 mıllıon teńgege jýyq qarjy jumsalǵan avtomattandyrylǵan keshen aldaǵy ýaqytta bıýdjet qazynasyn toltyrýǵa da úles qosady, – dedi óńir basshysy Berdibek Saparbaev.
Sharýa qojalyǵynyń aýdan ortalyǵynda «Temirlan» atty óz dúkeni bar. Dúkende turǵyndar aýyl sharýashylyǵy ónimderin kóńilge qonymdy baǵamen satyp alady. Mysaly, 30 paıyz maılylyqtaǵy qaımaqtyń jarty kılosy – 270, 2,5 paıyzdyq pasterlengen súttiń lıtri – 120, 82 paıyzdyq sary maıdyń kılosy – 1000, sıyr etiniń kılosy – 1000, baldyń kılosy – 800, birinshi suryptaǵy nan 45 teńgeden tolyp tur. Sondaı-aq, «E.Záıtenov» sharýa qojalyǵy 100 mıllıon teńge kólemindegi jeke qarjysy esebinen Semeı qalasynda áleýmettik jaǵynan az qamtylǵan otbasylarǵa arnalǵan azyq-túlik dúkeni qurylysyn júrgizbek.
Dýman ANASh,
«Egemen Qazaqstan».
Shyǵys Qazaqstan oblysy,
Borodýlıha aýdany.
