Ol ol ma, budan keıin qazirgi siz ben biz kıip júrgen shalbardy oılap tapty. At ústinde yńǵaıly otyraıyn dep bıik óksheli aıaq kıim jasap shyǵardy. Endi oılansańyz, adamzat órkenıetine úlken jańalyq engizýde kóshpendiler turmysynyń tamshydaı emes, teńizdeı úlesi bar. Muny sýretshi Nellı Býbeniń «Kóshpendiniń bir kúni» kartınasynan baıqaımyz.
Qazaqy boıaýdy qanyna sińirgen qylqalam sheberi óz týyndylarynda kóshpendilerdiń ómiri, kún men jaryq aıasyndaǵy jumbaq dala tarıhy, ádemi kıingen adamdar, túıe órkeshterindegi qundy júk beınelerinde beriledi. Onyń barlyq kartınasy kollaj, bederli pasta jáne týyndyǵa erekshe saltanat beretin altynmen jyltyratý syndy kúrdeli aralas tehnıkamen oryndalǵan.
«Kóshpendiniń bir kúni» kartınasynda kóshpendiler turmysynyń poezııasy berilgen, óz halqyna, onyń mádenıetine degen súıispenshilikke negizdelgen dala dástúri ózindik ereksheligimen jazylǵan. Shyǵarma shartty túrde eki bólimge bólinedi: Shyǵystyń kóne qalalarynyń sáýletine tán júk artqan túıeler, oń jaǵynda er adamdardyń beınesi kórsetilgen.
Sýretshi qarama-qarsy qanyq tústerdi paıdalanǵan, tulǵalardyń anyq nobaıy keneptiń kómeski altyn fonynda erekshelenip, kórermenniń nazaryn ózine tartady. Nellı Býbe óz týyndysynda qazaqtyń ulttyq kıimin kıgen ártúrli jastaǵy er adamdardy beıneleý arqyly urpaq sabaqtastyǵyn kórsetedi.
Baqsańyz, týyndynyń joǵarǵy jaǵyna petroglıfterdiń sýretin jáne saq jaýyngerleriniń qarýy sanalatyn eki aqınaqtyń sýretin ornalastyrý arqyly kóshpendilerdiń baıyrǵy mádenıetin jyrlaıdy. Munda sýretker kostıýmderge, baskıimge, turmystyq dástúrli zattarǵa iltıpatpen qaraıdy. Sol arqyly qazaq mádenıetiniń tarıhyn ǵana emes, sonymen qatar skıf, saq taıpalarynyń dáýirin de jyrlaıdy.
