Álimhan – Azııa chempıony!

Jarys kestesine saı alǵashqy kúni saıystar 5 salmaqta ótti. Chempıonatty birden shırek fınaldan bastaǵan jerles­terimizdiń barlyǵy da tusaýkeser kezdesý­lerinde jeńiske jetip, júldeli oryndar úshin talasý múmkindigine ıe boldy. Atap aıtsaq, talaı baıraqty básekede júlde alǵan Amanǵalı Bekbolatov (55 kılo) úndistandyq Arjýn Halakýrkıdiń tas-talqanyn shyǵaryp, jartylaı fınalda mońǵolııalyq Davaabandı Muńh-Erdendi ońaı eńserdi. Álem chempıonatynyń eki dúrkin júldegeri, Azııa oıyndarynda úshinshi satyǵa jaıǵasqan Meırambek Aınaǵulov (63 kılo) sırııalyq Ahmad Ál-Nak­dalıdi san soqtyrsa, ile-shala ıran­dyq Iman Hosseın Mohammadıdi bas kótertpeı utty.

Osydan 5 jyl buryn Azııada aldyna jan salmaı, odan bólek dál sol jarysta taǵy tórt ret júldegerler sanatyna qosylǵan Maqsat Erejepov (77 kılo) Úndistan ókili Sajan Sajandy esh qı­nalmaı utqanymen, japonııalyq Ko­baı Sakýrabaǵa qarsy saıysta biraz ter tógýine týra keldi. Otandasymyz óte shıe­­lenisti ótken kezdesýde bir ǵana upaı aıyr­mashylyǵymen jeńiske jetti. Alyp­­­tarmen aıqasqan Álimhan Syzdy­qovtyń da (130 kılo) qarqyny qýant­ty. О́zi­nen áldeqaıda eńseli ári salmaq­tary da zor qyrǵyzstandyq Roman Kım men japonııalyq Arata Sonony edáýir upaı aıyrmashylyǵymen utqan ol jan­kúıer­lerdiń qoshemetine bólendi. Osy­laısha, tórt balýanymyz sheshýshi synǵa joldama alsa, Nursultan Tursynov (87 kılo) jartylaı fınalda Parsy eliniń myqtysy Naser Gasem Álızadege jol berdi.

Fınalda Amanǵalı Bekbolatov (55 kı­lo) japo­nııalyq Iý.Shıotanımen bel­desti. Kún- shyǵys eliniń ókili byltyr Al­matyda ótken Azııa chempıonatynda aldyna jan salmaǵan edi. Ulanbatyrdaǵy jarysqa da ol óte tamasha babynda kelgen eken. Bul básekede Shıotanı Bekbolatovty 13:2 ese­bimen shań qaptyryp ketti. Eń je­ńil salmaqtyń qola medali Jasýrbek Or­tykbaev (О́zbekstan) pen Hıokınjın Jeonǵa (Ońtústik Koreıa) buıyrdy.

Meırambek Aınaǵulov Tynar Sharshen­bekovpen kezdesti. Bul balýannyń da esimi qazaq jankúıerlerine jaqsy tanys. Osy­dan úsh jyl buryn Qyrǵyzstannyń ókili Nur-Sultandaǵy álemdik dodanyń qola medali úshin beldesýinde bizdiń Almat Kebisbaevtan utylǵan edi. Sharshenbekovke qaraǵanda Aınaǵulovtyń ataǵy áldeqaıda zor. Biraq sheshýshi saıysta Meırambek qeńinen kósile almaı, qarsylasyna 0:5 esebimen ese jiberdi. 63 kılo salmaqta Neraj Neraj (Úndistan) ben Iman Hosseın Mohammadı (Iran) úshinshi oryndy ıelendi.

77 kılo salmaqtaǵy Maqsat Erejepov taǵy bir «aıyr qalpaqty» aǵaıynymyz Akjol Mahmýdovpen kúresti. 23 jastaǵy qyrǵyz sportshysynyń ataǵy alysqa jaıylǵan. Ol – Tokıo Olımpıadasy men Jakartadaǵy Azııa oıyndarynyń kúmis júldegeri, 2018 jylǵy Azııa chempıony. 23 sáýirde Maqsat 32 jasqa tol­ǵaly otyr. Sheshýshi aıqasta Mahmý­dov­tyń mereıi ústem boldy. Esep – 3:1. Qola me­daldy Kobaı Sakýraba (Japonııa) men Áref Mýzafar Habıbollahı (Iran) enshi­ledi.

Fınalda úsh balýanymyz da sát­sizdikke ushyraǵan soń Álimhan Syzdyqovtyń jolyna zor úmitpen qaradyq. Onyń qar­sylasy da tym azýly edi. Kım Mensok Tokıo Olımpıadasynan quralaqan oral­­ǵanymen, esesine odan basqa da kópte­gen jarysta bul apaıtóstiń atoı salǵa­nyn jankúıerler jaqsy biledi. Atap aıtsaq, Ońtústik Koreıanyń oǵlany 2018 jylǵy álem chempıonatynda kúmis medaldy moıny­na ildi, eki ret qurlyq birinshiliginde júldegerler sanatyna qosylyp, Azııa oıyndarynda úshinshi tuǵyrǵa taban tiredi. Desek te, ataqty qarsylasynan esh qaımyqpaǵan qazaqtyń nar tulǵaly jigiti báseke bastalǵan bette ony ári de, beri de laqtyryp, aıqyn jeńiske qol jetkizdi. Álimhan – Azııa chempıony! Al Mýmınjon Abdollaev (О́zbekstan) pen Roman Kım (Qyrǵyzstan) úshinshi oryndy ıelendi.

87 kılo salmaqtaǵy Nursultan Tur­sy­nov qola medal úshin básekede Mels Aıtbe­kovpen aıqasty. Birinshi kezeń­de qyrǵyzdy bozkilemde shyr aınal­dyryp, edáýir upaı qoryn jıǵan qanda­symyz odan keıin de óte saýatty qor­ǵanyp, jeńis tuǵyryna kóterildi – 8:2. Ekinshi qolany Kýmar Sýnıl (Úndistan) ıemdendi. Al Naser Gasem Álızade (Iran) men Jalǵasbaı Berdimuratovtyń (О́zbekstan) arasynda ótken sheshýshi syn alǵashqysynyń paıdasyna sheshildi.

TÚIIN: Osylaısha, Azııa chempıonatynyń alǵashqy kúnin Qazaqstannyń grek-rım kúresi sheberleri 1 altyn, 3 kúmis jáne 1 qola medalmen qorytyndylady. Iаǵnı bozkilemge shyqqan bes balýany­myz da júlde aldy. Alaıda dál qazir qazaq jankúıerlerin altyn medaldyń azdy­ǵy alańdatyp otyr. Al onsyz jalpy­komandalyq esepte úzdikter qatarynan kóriný qıynǵa soǵatyny anyq. Olaı bolsa, ekinshi kúni óner kórsetetin bes jigiti­miz sol olqylyqtyń ornyn toltyrady degen oıdamyz.