Sharany Aqparat jáne qoǵamdyq damý mınıstrliginiń qoldaýymen «Qazaqstandyq qoǵamdyq damý ınstıtýty» KeAQ uıymdastyrdy.
Otyrysqa QR Parlamenti Májilisiniń depýtattary, saıasattanýshylar, qoǵam qaıratkerleri men QQDI sarapshylary qatysty.
Eksperttik klýbtyń qatysýshylary Memleket basshysy Qasym-Jomart Toqaevtyń «Jańa Qazaqstan: jańarý men jańǵyrý joly» atty Qazaqstan halqyna Joldaýynda bastamashylyq etken «Ulttyq quryltaı» jańa qoǵamdyq ınstıtýtynyń iske asyrylýyn talqylady. Atap aıtqanda, qazirgi zamandaǵy Ulttyq quryltaıdyń negizgi aspektileri qarastyryldy.
Is-shara «Qazaqstandyq qoǵamdyq damý ınstıtýty» KeAQ Basqarma Tóraǵasy Qazbek Maıgeldınovtyń moderatorlyǵymen ótti. Ol jańa qurylym Ulttyq keńesterdiń qyzmetin jalpyhalyqtyq deńgeıde jalǵastyratyny týraly Prezıdenttiń tezısin keltirdi.
«Jańa ınstıtýttyń róli men mindetteri erekshe jáne Jańa Qazaqstandy qurýda tarıhı mańyzǵa ıe. «Ulttyq quryltaı» qoǵamdyq dıalogtyń biryńǵaı modelin qalyptastyryp, bılik pen halyq arasyn baılanystyrýshy kópirge aınalýy tıis. «Ulttyq quryltaıdyń» basty maqsaty – jalpyulttyq dıalogtyń shekarasyn keńeıtý», dedi QQDI basshysy.
QR Parlamenti Májilisiniń depýtaty Edil Jańbyrshın Prezıdenttiń qoǵam men memleket arasyndaǵy qatynastardy transformasııalaý qajettiligi týraly birneshe ret aıtqanyn atap ótti.
«Bizdiń Prezıdenttiń Qazaqstandy jańartýǵa, durys jolǵa baǵyttaýǵa degen ıgi umtylysy bar. Al biz, búkil el, ony biraýyzdan qoldaýymyz kerek! Mundaı transformasııa, eń aldymen, parlament jumysynda, Májilis qabyrǵasynda bastalýǵa tıis. «Jańa Qazaqstan» depýtattyq tobynyń atynan Parlament qabyrǵasynda qoǵam ómirin jaqsartýǵa qatysty eń ózekti suraqtardy kóterip, halyqtyń máselelerin ýaqtyly sheshý úshin qarqyndy jumys atqaramyz dep aıta alamyn. Depýtattar halyqtyń rýhanııatyn nyǵaıtýǵa, onyń ál-aýqatyn arttyrýǵa baǵyttalǵan jumysqa múddeli. Meniń oıymsha, bul da jańa ınstıtýttyń fýnksııalaryna kiredi. Ulttyq quryltaıdyń úlken artyqshylyǵy barlyq oblystyq qoǵamdyq keńesterdi ózine shoǵyrlandyrady. Bul túrli pikirlerdegi barlyq ókilderdi qamtıtyn qurylymdy qalyptastyrady», dep qorytyndylady Edil Jańbyrshın.
Ulttyq quryltaı quramy týraly QR Parlamenti Májilisiniń depýtaty Erlan Saırov ta óz pikirin bildirdi.
«Jańa keńesshi organ Qazaqstannyń barlyq oblystarynda jumys isteıdi. Buryn oblystyq jáne aýdandyq deńgeıde bolǵan barlyq qoǵamdyq keńester «Ulttyq quryltaı» formatyna enedi», dedi depýtat.
AMANAT partııasy depýtattyq fraksııasynyń múshesi Saıasat Nurbek elimizde jańa saıası mádenıetti qalyptastyrýda «Ulttyq quryltaı» qurýdyń mańyzdylyǵyn tilge tıek etti.
«Jańa Qazaqstandy jańa qaǵıdattar men jańa jumys formattarynan bastaý kerek. Jańa «Ulttyq quryltaı» ınstıtýtyn qurý barlyq ulttyq jobalar men strategııalyq qujattardy ashyq talqylaýdy qamtamasyz etýge múmkindik beredi. Bul – memleket pen jurtshylyqtyń el damýynyń neǵurlym tıimdi modelin ázirleý jónindegi ortaq jumysy».
Otyrys barysynda sarapshylar jańa ınstıtýttyń qandaı fýnksııalary men ókilettikteri bolýy tıis ekendigi týraly óz kózqarasyn aıtyp, pikirlerimen bólisti. Sondaı-aq otyrysqa qatysýshylar qoǵam men memleket arasynda turaqty keri baılanysty qalyptastyrý jónindegi qadamdardy talqylady.
